کرنې او مالدارۍ وزارت وايي چې د مني موسم د غنمو د کرکېلي په پار یې په ۳۴ ولایتونو کې پر یوشمېر بزګرانو د غنمو د اصلاح شویو تخمونو د وېش لړۍ پیل کړې ده.
د دې لړۍ په ترڅ کې د هېواد په کچه په ۲۸۰ زره بزګرانو د غنمو ۱۴ زره مټریک ټنه اصلاح شوي تخمونه وېشل کېږي. دغه لړۍ، چې څو ورځې مخکې پیل شوې، په ترڅ کې یې تر دې دمه د بامیان، لوګر، سرپل، پنجشیر او پروان پر یوشمېر بزګرانو د غنمو اصلاح شوي تخمونه وېشل شوي دي.
د غنمو یاد ۱۴ زره مټریک ټنه اصلاح شوي تخمونه د نړیوال بانک په مرسته د څه باندې ۶۲۱ میلیونه افغانیو په لګښت چمتو شوي او د کرنې وزارت د کرنې د ودې او خوړو خوندیتوب پروژې له لارې وېشل کېږي. د کرنې وزارت مسوولین وايي چې دغه تخمونه د سبسایډي په ډول وېشل کېږي، چې ۶۰ سلنه لګښت یې د کرنې وزارت او ۴۰ سلنه نور لګښت یې برخمن شوي بزګران پرې کوي.
