عبدالهادي ارغندیوال: که مو رایه راکړه ملي عواید تر ۴۰۰ میلیارده افغانیو رسوم

د مالیې وزارت لپاره نوماند وزیر عبدالهادي ارغندیوال وایي دوی له فساد سره جدي مبارزه پیل کړې ده چې له امله به یې د افغانستان ملي عواید ډېر شي. نوموړي چې نن یې د ولسي جرګې په غونډه کې د باور رایې اخیستو په موخه وکیلانو ته خپل پلانونه تشریح کول وویل، په افغانستان کې د مالي بسیاینې او اقتصادي ودې پر وړاندې تر ټولو ستر خنډ فساد دی او دغه وزارت د فساد پر وړاندې جدي او هر اړخیزه مبارزه پيل کړې ده. نوموړي وویل چې همدا اوس یې د فساد ضد جګړه روانه کړې ده او په دې برخه کې د حکومت او پارلمان ملاتړ غواړي. ارغندیوال دغه راز وویل که د ولسي جرګې غړي رایه ورکړي، نو دی به وکړی شي چې تر ۲۰۲۵ ز کال پورې د هېواد ملي عواید تر ۴۰۰ میلیارده افغانیو پورې ورسوي. ارغندیوال دغه راز ژمنه کړې ده چې په مالیې وزارت کې به پراخ اصلاحات او بدلونونه راولي او ستره موخه به یې دا وي چې په دغه وزارت کې دندې او کارونه وړ او مسلکي کسانو ته ورسېږي څو دغه مهم وزارت پیاوړی او د ډاډ وړ شي.