په کندوز کې یوه افغان سوداګر په خپل شخصي لګښت د وریجو د پروسس یوه فابریکه جوړه کړې ده.
د وریجو د پروسس د دې فابریکي کارکوونکي وايي چې دا فابریکه په ۲۴ ساعتونو کې د ۱۴۰ ټنو وریجو د پروسس وړتیا لري او ۸۵ فني کارکوونکي پکې کار کوي.
دا په کندوز کې چې د شولو حاصلات یې د افغانستان په کچه مشهور دي، په دې بڼه لومړنۍ فابریکه ده. د دې فابریکې څښتن خان محمد فروتن وايي، چې پر دې فابریکه یې څه باندې ۵ میلیونه ۷۰۰ زره ډالر لګښت کړی دی.
د هغه په وینا، د شمال ختیځ زون په درې ولایتونو کندوز، تخار او بغلان کې ۳۸۴۰ قراردادي کروندګر لري چې دې فابریکې ته شولې ورکوي.
هغه زیاته کړې: «زموږ هدف دا دی چې دهقانانو شولې په نړیوال شکل پروسس او بازار ته یې وړاندې کړو او ترڅنګ وزګاره خلکو ته د کار زمینه برابره کړو.»
