کرنې او مالدارۍ وزارت وايي چې له میکانېزه کرکیلې سره په هېواد کې د جوارو حاصلات پنځه برابره ډېر شوي دي.
د دغه وزارت ویاند اکبر رستمي زیاتوي، دوی هڅه کوي چې له دې لارې بزګران وکړای شي چې له خپلو کروندو څخه ښه او باکیفیته حاصلات ترلاسه کړي چې له یوې خوا به د بزګرانو عواید ډېر شي او له بلې خوا به هېواد د کرکېلي له پلوه پر ځان بسیا شي.
په ورته مهال د کندز د دشت ارچي ولسوالۍ اوسېدونکی وحیدالله وایي چې له کلونو را په دې خوا يې په خپله کرونده کې د جوارو کرکېله په دودیزه بڼه ترسره کوله چې په وینا یې، زحمت یې زیات، خو حاصل یې په نشت حساب و.
کرنې وزارت وايي چې د دغه وزارت اړوند د اوبو د زېرمو د پانګونې پروژې “LKISP” له خوا سلګونه بزګران روزل شوي او په پام کې ده چې ياده پروژه وغځول شي.
