د خوست سیمه ییز چارواکي وايي، چې په دغه ولایت کې د ۹۲ ميليونو افغانيو په لګښت د اوبو د نهو ذخیروي بندونو د جوړولو چارې پيل شوې.
د اوبو دغه ذخیروي بندونه د خوست په مرکز، تڼيو ولسوالۍ، اسماعيل خېل، مندوزي، ګربز، ځاځي ميدان او باک ولسوالیو کې جوړېږي چې اساسي موخه يې د سېلابونو د سرعت کموالی او تر ځمکې لاندې اوبو زېرمه کول دي.
ولايتي چارواکي وايي، دغه ذخیروي بندونه د اوبو د تنظيم ملي ادارې له خوا جوړېږي چې چارې به يې په راتلونکو اتو مياشتو کې بشپړې او ګټې اخيستنې ته وسپارل شي.
د خوست والي تورن جنرال مهمند کټوازي د دغو بندونو د کار پيل پر مهال ويلي چې ياد نهه واړه ذخیروي بندونه به د ۷۱۶۵۰۰ متره مکعب اوبو ذخيره کولو ظرفيت ولري. نوموړي زیاته کړې چې د يادو بندونو پر جوړولو شاوخوا ٩٢ ميليونه افغانۍ لګښت راځي.
