تېره ورځ یو ځل بیا د کابل ښاریانو ورځ په یوه درنه چاودنه پيل شوه. موټربم برید د کابل لوېدیځ ته د خوشحال خان سیمه ولړزوله. په پېښه کې د درنو مالي زیانونو ترڅنګ ملکي تلفات هم رامنځته شوي دي. د دغه موټربم هدف په ولسي جرګه کې د کابل د خلکو استازی حاجي خان محمد وردګ و. نوموړی په دې پېښه کې ټپي شوی، خو ویل کېږي چې څو ساتونکو یې خپل ژوند بایللی دی. افغان حکومت دغه برید غندلی او په خبره یې، طالبانو د جګړې په ډګر کې ماتې خوړلې، نو ځکه اوس په ښارونو کې دغه ډول بریدونه کوي.
کابل په دې وروستیو کې نا امنه شوی دی. چسپکې ماینونه، د سړک غاړې ته ځای پر ځای شوي ماینونه او تازه موټربم برید هغه څه دي چې د کابل ښاریانو ارام یې اخیستی دی. تېره ورځ د همدې نا امنیو په دوام د کابل ښار د پنځمې امنیتي حوزې په مربوطاتو کې د ولسي جرګې پر غړي حاجي خان محمد وردګ موټربم برید وشو. په دې پېښه کې نوموړی ټپي شوی دی. د کورنیو چارو وزیر تر پېښې څو ساعته وروسته دغې سیمې ته ورسېد او له خبریالانو سره یې خبرې وکړې. مسعود اندرابي خبریالانو ته وویل چې دا برید وسله والو طالبانو کړی دی. هغه وایي چې طالبانو د جګړې په ډګر کې ماتې خوړلې، نو ځکه اوس په ښارونو کې د دغه ډول بریدونو په ترسره کولو وېره خپروي. اندرابي دغه راز وایي چې په پېښه کې نهه کسان وژل شوي او د حاجي خان محمد په ګډون ۲۰ نور ټپیان شوي دي. د اندرابي په وینا: «په دغه چاودنه کې زموږ نهه ملکي هېوادوال شهیدان شوي. تر اوسه د ۲۰ تنو ټپیانو راپور ورکړل شوی چې ټول ټپیان په خپل وخت روغتونونو ته انتقال شوي دي. په ټپیانو کې په کابل کې د ولسي جرګې یو وکیل خان محمد وردګ هم شامل دی او وضعیت یې ښه دی».
د کورنیو چارو وزارت له لوري په خپره شوې اعلامیه کې هم راغلي چې ترهګرې ډلې غواړي د دغه ډول جنایتونو په ترسره کولو سره د سولې بهیر تخریب کړي او د خلکو ترمنځ وېره خپره کړي. د سرچینې په خبره، افغان حکومت د ترهګرو ډلو پر وړاندې خپلې مبارزې ته ادامه ورکوي او اجازه به ور نه کړي چې خپلو موخو ته ورسېږي. سرچینه کاږي: «دا ډول ترورېستي بریدونه د افغانانو پر وړاندې د ترهګرو د جنایت دوام ښيي. ترورېستان د ویجاړونې او وژنې کړنلاره لري. دوی هر ځل د جګړې په ډګرونو کې له ماتو سره مخ کېږي او قطعاً خپلو شومو موخو ته نه رسېږي».
ولسي جرګې هم دغه پېښه تایید کړې ده. د ولسي جرګې غړي وایي چې دوی دغه برید په کلکو ټکو غندي او پر حکومت یې غږ کړی چې د ولسي جرګې د غړو په امنیت کې خپلې هڅې ډېرې کړي. د ولسي جرګې لومړی مرستیال محمد میرزا کټوازی وایي، طالبان غواړي د جګړې له لارې واک ته ورسېږي، نو ځکه یې دغه ډول بریدونه پيل کړي دي. د ده په خبره: «موږ باور لرو چې طالبان لا هم غواړي د پاکستان په اشاره د زور له لارې واک ترلاسه کړي، ځکه دوی چې د جهاد کوم نوم مخکې کړی وو اوس خو جګړه له بهرنیانو سره نهده، بلکې دوی خپل وروڼه شهیدانوي، دوی غواړي چې هره ورځ چاودنې وکړي، وژنې وکړي او حکومت د ټوپک په وسیله وپرځوي».
سره له دې چې وسله والو طالبانو د برید په اړه غبرګون نه دی ښودلی او نه یې هم د دغه پېښې مسوولیت منلی، خو افغان حکومت دغه موټربم برید د طالبانو کار بولي. کورنیو چارو وزارت وایي چې وسله والو طالبانو په تېرو درېیو میاشتو کې لسګونه ملکي افغانانو ته مرګ ژوبله اړولې ده. د سرچینې په خبره: «سلهوالو مخالفینو له لوري په تېرو دریو میاشتو کې په دې هېواد کې ۳۷ انتحاري او ۵۱۰ ماین چاودنې شوي چې له املهیې ۵۰۰ ملکیان وژل شوي او ۱۰۵۰ نور ټپیان شوي دي».
په کابل کې داسې د عامو وګړو په یوه هستوګنیزه سیمه کې داسې مهال موټربم برید کېږي چې د افغان سولې لپاره د امریکا ځانګړي استازي زلمي خلیلزاد دلته د اوربند د تامین او ژر تر ژره د تاوتریخوالي د کمېدو غوښتنه کړې ده. نوموړي ویلي، تاوتریخوالی د منلو نه دی او دواړه لوري باید توافق ته د رسېدو لړۍ چټکه کړي.
