د خوست ولایت د کرنې ریاست چارواکي وایي، چې په دغه ولایت کې د چرګانو د روزنې او تولید صنعت ورځ تر بلې د پراخېدو په حال کې دی .
د یاد ولایت د کرنې ریاست د مالدارۍ او حیواني روغتیا امر روښان جلالي وایي، چې د خوست په مرکز او اړوندو ولسوالیو کې د غوښینو چرګانو شاوخوا ۷۸۰ فارمونه شتون لري، چې په ورځني ډول نږدې له ۱۰ زرو تر ۱۵ زرو کیلو ګرامه پورې غوښین چرګان بازار ته وړاندې کوي.
جلالي وایي، روان ۱۳۹۹یم کال د خوست په علیشېرو او سپېرې ولسوالیو کې د بڼوالۍ او مالدارۍ ملي پروژې په همکارۍ ۲۵۰ فارمونه بې وزلو کسانو ته هم جوړ شوي او ترڅنګ یې د چرګانو روزنې اړوند توکي، د خوراکي توکو وېش، بې وزلو مېرمنو ته د ۱۴۴ هګیو چرګانو ورکړه، د ناروغیو ضد درمل، عامه پوهاوی او د همکارو پروژو له خوا د نویو فارمونو جوړښت هغه چارې دي، چې د کرنې ریاست او اړوندو پروژو له خوا ترسره شوې دي.
