د کرنې او مالدارۍ وزیر انوارالحق احدي وایي، د خصوصي سکټور په همکارۍ به تر راتلونکو څلورو کلونو پورې افغانستان د چرګانو د غوښې د تولید په برخه کې پرځان بسیا کړي.
نوموړي دا خبرې د البدر په نوم د چرګانو د دانې جوړولو د يوې فابريکې د پرانیستې پرمهال کړي او ويلي یې دي چې دمګړۍ د کال نږدې ۲۲۰زره ټنه د چرګانو غوښه توليدېږي، خو د افغانستان اړتیاوې په کال کې څه باندې ۲۹۰ زره ټنه ده.
بلخوا د یاد وزارت ویاند اکبر رستمي وایي چې، البدر د چرګانو د دانې تولیدي فابریکه ده، چې د حبوباتو د پروسس او بسته بندۍ په برخه کې هم کار کوي.
کرنې وزارت زیاتوي، چې د چرګانو د روزنې د فارمونو پر وړاندې یوه لویه ستونزه د چرګانو د دانې نه شتون و، چې دا ستونزه هم د پانګه والو په پانګونې سره هوارېدو په حال کې ده.
