مالیې وزارت: په ۹۹ کال کې مو عواید ټاکلي هدف ته و نه رسېدل

مالیې وزارت وایي په ۱۳۹۹ کال کې د عوایدو ټاکلي هدف ته نه دي رسېدلي. د یاد وزارت د معلوماتو له مخې د تېر مالي کال په پیل کې یې کورنیو عوایدو ته ۲۰۸ میلیارده افغانۍ هدف ټاکلی و، خو د کرونا وبا ددې سبب شوه چې یاد وزارت خپل هدف ته و نه رسېږي. سرچینه وایي چې د کرونا وبا د محدودیتونو له امله یې ټول کال ۱۷۴ میلیارده افغانۍ عواید لرلي دي. مالیې وزارت دا هم وايي چې د عوایدو کسر یې له نړیوالو مرستو پوره کړی دی. مالیې وزارت داسې مهال تېر مالي کال هدف ته د نه رسېدو خبره کوي، چې لا هم په افغانستان کې د کرونا وبا له امله ګواښونه ډېر دي او ښايي د حکومت پر عوایدو خپل مستقیم اغېز ولري. کارپوهان بیا په دې باور دي چې د فساد له امله د افغان حکومت عواید کم دي، نو ددې اړتیا ده چې شفافیت ډېر شي او په عایداتي ادارتو کې د فساد کچه صفر ته راښکته کړل شي.