ان پي ار: څلوېښت سلنه افغان ماشومان له خوارځواکۍ سره مخ دي

په افغانستان کې څلوېښت سلنه ماشومان له خوارځواکۍ سره مخ دي. ان پي ار راډیو په یوه راپور کې په افغانستان کې روان وضعیت او د کرونا له امله رامنځ ته شوي ناورین ته کتنه کړې ده. په راپور کې راځي چې په افغانستان کې د خلکو اقتصادي وضعیت کمزوری دی او د نړیوالو له میلیاردونو ډالرو مرستو سره سره د ملکي وګړو په ژوند کې هېڅ راز مثبت تغیر نه دی راغلی. سرچینه وایي چې همدا اوس د کمزوري اقتصاد له امله څلوېښت سلنه ماشومان له خوارځواکۍ سره مخ دي. په دې راپور کې ځینو خلکو نظر ورکړی دی او وايي چې نړیوالو بنسټونو، د بشري حقونو فعالینو او لسګونه فساد ضد موسسو په افغانستان کې حضور درلود خو ددوی په مخ کې میلیاردونه ډالر تري تم شول او د افغانانو پر ژوند یې مثبت تاثیر نه درلود. په دې اړه تر دې وړاندې هم ګڼ نړیوال راپورونه خپاره شوي او پکې راغلي چې لوړه سلنه افغانان د فقر تر کرښه لاندې ژوند کوي او د هېواد نیمايي نفوس ان د لومړنیو خوراکي توکو مرستې ته هم اړ دي.