امنیت شورا: د بهسودو پېښې ارزونې لپاره یو پلاوی لېږل شوی دی

ملي امنیت شورا وایي د بهسودو پېښې د ارزونې لپاره یې یو پلاوی لېږلی دی. د افغانستان د ملي امنیت شورا د مطبوعاتي دفتر له لوري په خپره شوې اعلامیه کې راغلي چې د ملي امنیت شورا، سیمه ییزو ارګانونو او ملي امنیت ادارو یو ګډ پلاوی د بهسودو لومړۍ حصې ولسوالۍ ته تللی او په دغه ولسوالۍ کې وروستۍ رامنځ ته شوې پېښه په هر اړخیزه توګه ارزوي. په دغه ولسوالۍ کې د علي پور غیر مسوولو او ناقانونه وسله والو د افغان حکومت پر پوځ برید کړی دی چې له امله یې اوږده نښته رامنځ ته شوې او خلکو ته پکې مرګ ژوبله اوښتې ده. علي پور یو غیر مسوول وسله وال دی چې له کلونو راهیسې د افغانستان په مرکزي سیمو کې فعالیت کوي او وخت ناوخت د خلکو په ځورونه او تښتونه هم تورن شوی دی. هغه په ۲۰۱۸ز کال کې افغان ځواکونو ونیو خو د ولسمشر دویم مرستیال د یو لړ ضمانتونو تر اخیستلو وروسته بېرته خوشی کړ چې اوس بیا ځلې حکومت ته په ستره ستونزه بدل شوی دی.