افغانستان او هند د شاه‌توت بند جوړولو تړون لاسلیک کړ

د افغانستان او هند ترمنځ د شاه‌توت بند جوړولو تړون لاسلیک شوی دی. دا تړون نن د ولسمشر غني او د هند د لومړي وزیر نریندرا مودي په حضور کې د یوې انلاین غونډې په ترڅ کې لاسلیک شوی دی. ویل کېږي چې د دې بند پر جوړولو به ۲۸۶ میلیونه ډالر لګښت راشي او په کمه موده کې به ګټه اخیستنې ته وسپارل شي. ولسمشر غني یادې غونډې ته په خبرو کې ویلي چې د هېواد د اوبو مدیریت پلان یې په بریالۍ توګه پر مخ روان دی. د هغه په خبره، د بندونو د جوړولو چارې په عملي ډول یو پر بل پسې روانې دي چې له سلما، کمال خان، شورابک، د کجکي د دویم فاز، شاه او عروس بندونو تر جوړولو وروسته له نیکه مرغه دا وخت هم را ورسېد چې شاه‌توت بند هم جوړېږي. په ورته وخت کې د هند لومړي وزیر نریندرا مودي یو ځل بیا له افغانستان سره هر اړخیزو همکاریو ته ټټر وهلی او د یو سوله ییز افغانستان هیله یې څرګنده کړې ده.