اسلام کلا کې اورلګېدنه؛ افغان دولت، تر څېړنو وروسته زیانمنو ته د مرستې ډاډ ورکړی

د هرات ولایت اسلام کلا بندر کې تر اورلګېدنې وروسته د زیانونو په اړه بېلابېل راپورونه ورکول شوي دي، افغان دولت ویلي چې د اور لګیدنې پیښه د مالیې وزارت او بیلابیلو ګمارل شویو ډلو له لوري تر نظارت لاندې ده. دولت په یاده پېښه کې زیانمنو شویو په ځانګړې توګه سوداګرو ته ډاډ ورکړی دی چې د موضوع تر څېړلو وروسته به د مرستو په ګډون ټول اړین اقدامات تر سره کړي. مالیې وزارت په خپرې کړې خبرپاڼه کې ویلي چې په یاده پېښه کې هېوادوالو او سوداګرو ته زیان اوښتی دی، خو ګڼ شمېر نور غلا شوي موټرونه د افغان کومانډو ځواکونو له لوري ژغورل شوي دي. د یاد وزارت په خبره، د دغې پېښې د څیړنې لپاره د بحران کمیټه چې له مختلط پلاوي څخه جوړه شوې ساحې ته استول شوې څو د یادې پیښې د څرنګوالي، د اوښتي زیان د ارزونې، زیانمنو شویو ته د رسیدنې، د ترسره شویو اجراتو د ارزونې او په راتلونکې کې له ورته پیښو د مخنیوي لپاره مشخصه طرحه جوړه کړي.