د موټر چلوونکو اعتصاب؛ کابل کې د تېلو او خوراکي توکو بیې لوړې شوې

له تېرو څو ورځو راپدېخو په کابل کې د تېلو، ګازو او خوراکي توکو بیې لوړې شوې دي، سوداګرۍ خونه د دغې ستونزې لامل د کابل-کندهار لویې لارې د موټر چلوونکو اعتصاب بولي او وایي چې حکومت له ژمنې سره سره د اعتصاب کوونکو ستونزو ته رسیدګي نه ده کړې. د دغې خونې مسوولین زیاتوي چې د لویو لارو بندېدو او موټر چلوونکو د کاري اعتصاب له امله د هیواد سوداګریز سکټور ته هم ستر اقتصادي زیان رسېدلی او له تیرو ۱۹ ورځو راپدېخوا د رامنځته شويو ستونزو له امله په سوداګریزو بندرونو کې په توکو بار زرګونه موټر بند پاتې دي. د یادونې ده چې له تیرو څو ورځو راپدېخوا د بار وړونکو موټرو چلوونکو د کابل ـ کندهار پر لویه لار له هغوی څخه د غیر قانوني پیسو اخیستلو په غبرګون کې کاري اعتصاب پيل کړی او له دولت څخه یې د ستونزې د اواري غوښتنه کړې ده. که څه هم کورنیو چارو وزارت دې ستونزې ته د رسیدګي ژمنه کړې ده خو تر اوسه په دې برخه کې عملي اقدامات نه دي شوي.