افغان لوری د بین الافغاني خبرو د ژر تر ژره پیلېدو غوښتنه کوي. سره له دې چې څه باندې یوه میاشت کېږي، چې بین الافغاني مذاکرات ځنډېدلي، خو طالبان یې لاملونه بېل ښيي، افغان حکومت بیا پر دې باور دی، چې طالبانو تاوتریخوالی ډېر کړی او د مذاکراتو له مېز په شا شوي دي. د ملي مصالحې عالي شورا بیا ټینګار کوي، چې اوربند او د تاوتریخوالي کمېدل د افغانانو غوښتنه ده او طالبان باید تاوتریخوالی کم کړي او له جګړو لاس واخلي. بلخوا په پلازمېنه کابل او ولایتونو کې بیا د تاوتریخوالي اوج خلک اندېښمن کړي دي.
کابل تېره ورځ هم د وړمې ورځې په څېر د بوږنوونکو امنیتي پېښو شاهد و. مازیګر مهال یوې چاودنې د کابل ښار په برکي څلور لارې کې مرګ ژوبله واړوله او له دغه پېښې په ټولنیزو رسنیو کې خپرې شوې ویډیوګانې او انځورونه خورا بوږنوونکي دي. وړمه ورځ هم په کابل کې تر ماښامه درې پرله پسې چاودنې وشوې، چې پنځه کسان یې ووژل. د دغو پېښو مسوولیت هېڅ ډله نه مني، خو افغان حکومت یې بیا په اړه د پلټنو او څېړنو خبره کوي.
بلخوا د افغانستان د ملي مصالحې عالي شورا رییس ډاکتر عبدالله عبدالله بیا د دې غوښتونکی دی چې بین الافغاني مذاکرات ژر تر ژره پيل شي. ډاکتر عبدالله عبدالله تېره ورځ په یوه خبري کنفرانس کې د خبرو پر مهال وویل، چې د تاوتریخوالي کمېدل او د جګړو ختمېدل د افغانانو ستره غوښتنه ده او طالبان باید د افغان ولس غوښتنې ته درناوی وکړي. د ده په خبره: «اوربند د افغانانو مهمه او اصلي غوښتنه ده. د تاوتریخوالي دوام هره ورځ له افغانانو قرباني اخلي. دا لړۍ باید پای ته ورسېږي».
عبدالله د خپلو خبرو په دوام له وسله والو طالبانو وغوښتل، چې ژر تر ژره تاوتریخوالی ختم کړي او د مذاکراتو مېز ته راوګرځي. د ده په خبره، د افغان حکومت مذاکراتي پلاوی لا هم په دوحه کې دی او لا هم د دې لپاره تیار دی چې له طالبانو سره خبرې پيل کړي، خو دې ډلې ته په کار ده چې خبرو ته ادامه ورکړي. عبدالله دغه راز وایي چې د طالبانو له لوري روان کړی تاوتریخوالی هم هره ورځ له عامو افغانانو قرباني اخلي. د ده په وینا: «موږ د دې غوښتونکي یو چې ژر تر ژره مذاکرات په جدي توګه پيل شي او دوام پیدا کړي».
ډاکتر عبدالله عبدالله داسې مهال دغه څرګندونې کوي، چې تېره ورځ د امریکا د بهرنیو چارو وزیر هم پر افغان سوله څرګندونې لرلې. نوموړي له ډاکټر عبدالله عبدالله سره په خبرو کې ویلي، چې دوی په افغانستان کې د روانې جګړې د پای ته رسېدو ملاتړي دي او په دې برخه کې خپلې همکارۍ ډېروي. عبدالله بیا ویلي چې له انتوني بلینکن سره یې د طالبانو له لوري پر روان تاوتریخوالي هم خبرې کړې دي. د ده په خبره، دواړو لورو ټینګار کړی چې باید طالبان تاوتریخوالی کم کړي او جدي مذاکراتو ته ادامه ورکړي.
بلخوا د تاوتریخوالي په اوج کې د سیاسي چارو شنونکي هم وایي چې د جګړو د دوام او تاوتریخوالي د دوام لامل د امریکا کړنې دي. د سیاسي مسایلو څارونکی او د پوهنتون استاد فیض ځلاند وايي، طالبانو تاوتریخوالی ډېر کړی او لامل یې هم دا دی چې فکر کوي جو بایډن به له خپلو ژمنو په شا شي. د ده په خبره: «طالبانو ځکه تاوتریخوالی ډېر کړی، چې فکر کوي بایډن به پر خپلو ژمنو عمل و نه کړي».
بلخوا طالبانو ته نږدې سرچینې بیا وایي، چې له دوی سره په هوکړه کې پر شویو ژمنو عمل نه دی شوی. د دوی په خبره، د هوکړې له مخې یې مشران له تور لېست نه دي ایستل شوي، د بندیانو مسئله یې نه ده روښانه شوې او د بهرنیو ځواکونو د وتلو برخلیک هم تر دې دمه نه دی واضح شوی. افغان حکومت بیا په دې باور دی چې طالبانو پر ژمنو عمل نه دی کړی او دمګړی له مذاکراتو هم په شا شوي دي.
