د امریکا د دفاع پخواني وزیران: اوس وخت کې به د افغانستان پرېښودل بدې پایلې ولري

د واشنګټن ایګزماینر د راپور له مخې، د امریکا د دفاع وزارت دوو پخوانیو وزیرانو رابرت ګیټس او مارک ایسپیر ویلي چې په اوسني وضعیت کې له افغانستان څخه د سرتېرو ایستل به بدې پایلې ولري. د بارک اوباما د دورې دفاع وزیر رابرت ګیټس او د ټرمپ د دورې وروستي دفاع وزیر مارک ایسپیر بایډن ته سپارښتنه کړې ده چې د مې میاشتې تر لومړۍ نیټې پورې باید امریکایي سرتېري له افغانستان څخه ونه ایستل شي. ایسپیر ویلي چې دوی د دوحې پر هوکړه په بشپړه توګه عمل کړی دی خو طالبانو په یاده هوکړه کې ذکر شویو ژمنو باندې چې د تاوتریخوالي کمول، له افغان حکومت سره د مذاکراتو پیلول او له القاعده شبکې سره د اړیکو پرې کول و له دې ډلې یې پر یوې هغې هم عمل نه دی کړی. هغه زیاته کړې دوی خپل حسن نیت وښود خو په خبره یې له بده مرغه چې طالبانو ژمنتیا ونه ښوده. ایسپير دغه راز ویلي چې دی په افغانستان کې د امریکایي سرتېرو د کمولو پر سر هم له ټرمپ سره مخالف و خو هغه دا کار په ډېره بې پروایي تر سره کړ. په ورته وخت کې رابرټ ګیټس بیا ویلي، طالبانو ته باید دا پیغام ورسول شي چې څو پورې د سولې مذاکرات په جدي توګه پیل نه کړي امریکا له افغانستانه نه وځي.