د افغان سولې لپاره د هڅو د چټکتیا په دوام، تازه د ملي مصالحې عالي شورا هم په همدې تړاو خپله پنځمه ناسته جوړه کړې وه. د ملي مصالحې عالي شورا د رهبرۍ غړو په دې ناسته کې د سولې پر روان بهیر او د امریکا د سولې پر طرحې او تګلارې خبرې کړې دي. تر څنګ یې ټینګار شوی چې دغه ډول غونډې به دوام کوي او د افغان سولې په تړاو په راتلونکو نړیوالو غونډو کې باید د حکومت دريځ واضح وي. بلخوا امریکا له افغان چارواکو سره په لیدنه کې اوسنی تاوتریخوالی د اندېښنې وړ بللی او د درېدو غوښتنه یې کړې ده.
وروسته له هغې چې امریکا په استانبول کې د افغان سولې په تړاو او روسیې هم په مسکو کې د سولې کنفرانس د جوړولو خبره وکړه، افغان چارواکو هم په دغو کنفرانسونو کې د ګډون لپاره تیاري او سلا مشورې پیل کړې دي. د ملي مصالحې عالي شورا غړو پرون پر همدې مسئله غونډه کړې وه. د ملي مصالحې عالي شورا له مطبوعاتي دفتره په خپره شوې اعلامیه کې راغلي، چې په دې ناسته کې د ملي مصالحې عالي شورا د رهبرۍ کمېټې غړو ګډون کړی و او د سولې پر وروستیو پرمختګونو یې بحث کړی دی.
اعلامیه وایي، چې غونډه د ډاکتر عبدالله عبدالله په خبرو پیل شوه او هغه وویل چې د افغانستان په اړه په نږدې راتلونکي کې نړیوال کنفرانسونه جوړېدونکي دي چې باید افغان حکومت پکې واضح دريځ ولري. نوموړي همدا راز ویلي چې افغانستان دمګړی په مهمو شرایطو کې دی او رامنځ ته شوي فرصتونه د هېواد لپاره برخلیک ټاکونکي دي، نو له همدې امله بحثونو او د دريځ روښانولو ته اړتیا ده. په اعلامیه کې راځي، چې ډاکټر عبدالله د امریکا د سولې پر طرحې او نورو مسایلو هم د مصالحې عالي شورا له غړو د نظر غوښتنه کړې ده. اعلامیه زیاتوي: «د ملي مصالحې عالي شورا رییس وویل، د نن ورځې ناسته ډېره حیاتي ده، موږ باید د امریکا متحده ایالتونو له خوا د وړاندې شوې طرحې او د افغان سولې په تړاو سیمهییزې او نړیوالې ناستې چې په نږدې راتلونکې کې به پیل شي، باید روښانه او واضح دریځ ولرو».
ډاکټر عبدالله عبدالله په خپلو خبرو کې د امریکا طرحې ته په اشارې ویلي، چې افغان چارواکي له بحثونو وېره نه لري او په خبره یې، پر هره هغه لاره او انتخاب به بحثونه کوي، چې افغانان یو ګام سولې ته نږدې کولی شي. هغه ټینګار کړی چې په راتلونکو نړیوالو بحثونو کې د افغان حکومت دریځ باید روښانه وي او دا پرېکړه د ملي مصالحې عالي شورا غړي باید وکړي. د دغې شورا د رهبرۍ کمېټې غړو هم وویل چې دوی د سولې ملاتړي دي او په خبره یې، د افغان حکومت داعیه برحقه ده او په دې تړاو د خپل دريځ دفاع ته تیار دي.
د ملي مصالحې عالي شورا د رهبرۍ کمېټې غړو د امریکا د سولې پر طرحه، راتلونکو اقداماتو او جوړېدونکو کنفرانسونو هم خبرې او بحثونه کړي دي. دوی ویلي، افغان حکومت د سولې ملاتړی دی، په همدې هدف یې پلاوی په دوحه کې دی چې له بشپړ او هر اړخیز ملاتړ او صلاحیت برخمن دی. دوی وویل چې افغان سوله سیمهییزه او نړیواله جنبه لري، نو له همدې امله د سیمې هېوادونو او نړیوالو ته په کار ده چې په دې برخه کې خپلې مرستې او همکارۍ ډېرې کړي. دوی ټینګار کړی، چې د دغه بهیر بریا د نړیوالو په صداقت پورې تړلې او که دوی له افغان سولې سره صادقانه همکاري وکړي، دلته به روانه جګړه ډېره ژر ختمه کړل شي. د ملي مصالحې عالي شورا غړو دغه راز د سولې بهیر د چټکتیا، اوربند، جګړې د کمېدو او تلپاتې سولې او ثبات د راتګ غوښتنه کړې ده.
بلخوا د سولې په دې هلو ځلو کې د امریکايي پوځ د مرکزي قوماندانۍ قومندان جنرال کېنټ مکینزي افغانستان ته راغلی و او له ولسمشر غني سره يې په لیدنه کې له افغان ځواکونو د ملاتړ ډاډ ورکړی دی. تر څنګ یې دا هم ویلي وو چې اوسنی تاوتریخوالی د منلو نه دی او طالبان باید د سولې هوکړې ته خپله ژمنتیا وښيي.
