د بهرنیو ځواکونو د ایستلو په اړه د بایډن د پرېکړې تر اعلان وروسته، په کور دننه ځینو سیاسي څېرو او ګوندونو غبرګون ښودلی دی. په همدې لړ کې د حزب اسلامي مشر ګلبدین حکمتیار غبرګون ښودلی او په وینا یې د سرتېرو د ایستلو په پروسه کې ځنډ د افغانستان د سولې پروسه له خنډ سره مخ کړي. حکمتیار همدا راز د سرتېرو په ایستلو کې ځنډ د ستونزو له امله نه؛ بلکې سیاسي دلایل لري. حکمتیار پر طالبانو هم غږ کړی چې له بین الافغاني مذاکراتو سره باید پرېکون ونه کړي او خبرو ته دې ادامه ورکړي.
د امریکا ولسمشر جو بایډن اعلان وکړ چې د سرتېرو د ایستلو پروسه به د مې له لومړۍ نېټې پيلوي او د سپټمبر تر یوولسمې پورې به یې بشپړوي. بایډن په دې توګه په ښکاره توګه د دوحې هوکړه نقض کړې ده. د دې هوکړې پر بنسټ باید د مې تر لومړۍ نېټې ټول بهرني سرتېري له افغانستانه وتلي وای، خو بایډن وایي چې له لوجستیکي اړخه دا چاره د مې تر لومړۍ ممکنه نه ده. دې مسئلې د افغان حکومت او طالبانو غبرګون له ځان سره درلود. طالبانو وویل، تر هغه چې بهرني ځواکونه په افغانستان کې وي، دوی به د افغانستان په تړاو په هېڅ کنفرانس کې ګډون ونه کړي، خو افغان حکومت بیا وایي چې افغان پوځ د بهرنیانو له حضور پرته هم د خپل هېواد دفاع ته تیار دی او د بهرنیو ځواکونو د وتلو په برخه کې به همکاري کوي.
بلخوا په افغانستان کې ځینو سیاسي جریانونو هم پر تازه تحولاتو غبرګون ښودلی دی. د حزب اسلامي مشر ګلبدین حکمتیار تېره ورځ د بهرنیو ځواکونو د وتلو پر پرېکړه د غبرګون تر څنګ د سولې لپاره خپله طرحه اعلان کړې ده. نوموړي په یوه خبري کنفرانس کې د خبرو پر مهال وویل چې د بهرنیو ځواکونو د وتلو په بهیر کې ځنډ به د ترکیې غونډه له خنډ او ځنډ سره مخ کړي. د ده په خبره، د امریکا د دې پرېکړې تر شا دلایل ټول سیاسي دي او دا پلمې بېځایه دي چې ګواکې د مې تر لومړۍ نېټې د سرتېرو ایستل ناشوني وو. د ده په خبره، دا چې امریکایي ځواکونو د سرتېرو په ایستلو کې ځنډ راوستی دا پخپله یوه سیاسي پرېکړه ده.
ګلبدین حکمتیار دغه راز پر طالبانو هم غږ کړی دی چې له افغان لورو سره خپلو مذاکراتو ته ادامه ورکړي. د ده په وینا، د طالبانو او امریکا تر منځ معامله په دوی پورې اړه لري؛ خو له افغان لوري سره باید خپلې خبرې ونه دروي. حکمتیار زیاتوي: «د طالبانو او امریکا ترمنځ معامله په دوی پورې اړه لري. له امریکایانو سره چې هر څه کوي، خو په هېڅ صورت دې له افغان لوري سره مذاکرات نه ځنډوي. له بین الافغاني خبرو سره دې مقاطعه نه کوي.»
د حزب اسلامي مشر همدا راز د سولې لپاره په خپله طرحه کې ویلي، چې ولسمشر غني دې استعفا ورکړي، د حکومت د تنظیم لپاره دې یوه عالي شورا رامنځ ته کړل شي او د نظام د ساتلو او پایښت لپاره باید هڅې ډېرې شي. هغه یو ځل بیا پر طالبانو غږ وکړ چې له جګړو لاس په سر شي او د سولې لار خپله کړي او په وینا یې سوله یوازې د خبرو له لارې راتلی شي او که طالبان بین الافغاني مذاکرات ځنډوي، نو د نړیوالو او افغانانو له غبرګون سره به مخ شي.
بلخوا امریکایي چارواکي بیا وایي چې دوی په افغانستان کې هر څه څاري او اجازه به ور نه کړي چې وضعیت کړکېچن شي. د امریکا د بهرنیو چارو وزیر په تازه څرګندونو کې ویلي، چې بروکسل او کابل ته یې سفر له لاسته راوړنو ډک و او په خبره یې، دوی دې ته ژمن دي چې په افغانستان کې روانه جګړه پای ته ورسوي. هغه همدا راز ټینګار کړی چې امریکا او ناټو تر وتلو وروسته له افغانستان سره هر ډول همکارۍ ته ژمن دي او د دغه هېواد ملاتړ ته به ادامه ورکوي.
