د امریکا مخکیني ولسمشر ډونالډ ټرمپ له افغانستانه د سرتېرو د ایستلو په پرېکړه کې د ځنډ راوستلو له امله پر بایډن نیوکه کړې ده او د هغه تازه پرېکړه یې غندلې ده. بلخوا د ولسي جرګې ډېرو غړو د پرونۍ غونډې په امتیازي ساعت کې د خبرو پر مهال د بایډن دا پرېکړه ستایلې، چې له افغانستانه به خپل ځواکونه وباسي. د ولسي جرګې غړو ټینګار کړی چې د امریکايي او نورو بهرنیو ځواکونو په وتلو سره به په افغانستان کې روان ناورین پای ته ورسېږي.
د امریکا ولسمشر جو بایډن اعلان کړی چې د سپټمبر تر یوولسمې نېټې به خپل ټول ځواکونه له افغانستانه وباسي. هغه ویلي چې د سرتېرو د ایستلو لپاره هېڅ شرط نه لري. د دوحې د هوکړې پر بنسټ ټاکل شوې وه چې د ناټو او امریکا ځواکونه د مې تر لومړۍ نېټې پورې له افغانستان ووځي، خو بایډن دغه موده وغځوله او اعلان یې وکړ چې د سپټمبر تر یوولسمې به یې سرتېري له افغانستانه ووځي. په همدې تړاو د امریکا مخکیني ولسمشر ډونالډ ټرمپ پر بایډن نیوکه کړې ده. ډونالډ ټرمپ په خپلو تازه څرګندونو کې ویلي چې د سرتېرو د حضور دوام ته هېڅ راز اړتیا او پلمه نشته ده، نو له همدې امله بايډن ته پکار ده چې ټول سرتېري وباسي. ټرمپ ټینګار کړی چې لا هم د مې تر لومړۍ د سرتېرو ایستل ممکن کار دی. د ټرمپ په خبره: «موږ د سرتېرو شمېر راښکته کړ. د سرتېرو د حضور دوام ته هېڅ راز پلمه نشته ده. ټول مالي او نور مسایل مو سنجولي دي، اوس هم د سرتېرو ایستل ممکن دي.»
له دې سره جوخت د ولسي جرګې ډېرو غړو هم د تېرې ورځې غونډې په امتیازي ساعت کې د بهرنیو ځواکونو د وتلو پر مسئله خبرې وکړې. د ولسي جرګې غړو نیوکه وکړه چې امریکایي ځواکونو په تېرو شلو کلونو کې افغانستان ته یوازې بدمرغي راوړې او دلته یې بشري ناورین رامنځ ته کړی دی. د وکیلانو په خبره، امریکا په افغانستان کې قومي او سمتي تعصبونه رامنځ ته کړل او د دې سبب شوه چې د افغانانو ترمنځ واټن ډېر شي. په ولسي جرګه کې د کندوز د خلکو استازي په خپلو خبرو کې وویل: «امریکایي ځواکونو ته پکار ده چې ژر تر ژره له افغانستانه ووځي. دوی پخپله راغلي او پخپله به ځي. څومره ژر چې بهرني ځواکونه له افغانستانه ووځي، دومره د افغانانو په ګټه ده.»
د ولسي جرګې غړي همدا راز وایي چې د بهرنیو ځواکونو د حضور دوام دلته د جګړو د دوام سبب کېدلی شي او باید ژر تر ژره له دې ځایه ووځي. وکیلانو د دې تر څنګ پر طالبانو هم غږ کړی دی چې له جګړو لاس واخلي او له افغان حکومت سره مخامخ خبرو ته ادامه ورکړي. د وکیلانو په خبره، که د طالبانو پلمه بهرني ځواکونه وي، نو دوی خو د خپلو وتلو نېټه معلومه کړه، نو اوس طالبانو ته پکار ده چې له افغانانو سره له جګړې لاس واخلي. په ولسي جرګه کې د هرات د خلکو یوه استازي په خپلو خبرو کې وویل، که طالبان له جګړو لاس په سر نه شي، نو ښایي د ولس له قهر سره مخ شي. د نوموړي په خبره: «طالبان دې نور د افغانانو پر وړاندې جګړه نه کوي، امریکايي ځواکونه وځي، نو ځکه اوس افغانانو ته پکار ده چې په خپلو کې سره کېني. که طالبان سوله ونه کړي او جګړو ته ادامه ورکړي، ارو مرو د ولس له قهر سره مخ کېږي.»
له دې سره جوخت په امریکا کې هم د بهرنیو ځواکونو د وتلو پرېکړې غبرګونونه پارولي دي. تازه د امریکا د ملي امنیت سلاکار جک سلیوان هم ویلي چې دوی له افغانستانه خپل ځواکونه وباسي او د سرتېرو تر وتلو وروسته وضعیت باید افغانان پخپله مدیریت کړي. د هغه په خبره، دوی په دومره کلونو کې له افغانانو سره مرسته کړې ده، اوس به هم خپل ملاتړ ته ادامه ورکوي؛ خو د راتلونکو ګواښونو پر وړاندې مبارزه هم د افغانانو کار دی.
