د افغانستان روغتیايي چارواکو په افغانستان کې د کرونا د درېیمې څپې له پيلېدو خبر ورکړی او وایي چې د دې څپې پر وړاندې باید اړین چمتووالی ونیول شي. د عامې روغتیا سرپرست وزیر پرون په یوه خبري غونډه کې د خبرو پر مهال وویل چې له ګاونډیو هېوادونو د کرونا د بلې څپې د راتګ خطر شته، نو له همدې امله دوی حکومت ته یوه طرحه سپارلې چې له مخې یې د دغې څپې د پراختیا مخنیوی وشي. په ورته وخت کې د افغانستان په ګاونډیو هېوادونو کې د کرونا درېمې څپې سختې ستونزې پارولې دي او خلک یې اندېښمن کړي.
افغانستان د کرونا د لومړۍ څپې له پيله له جدي خطر سره مخ و، خو افغانان له دې څپې د ګاونډیو هېوادونو په پرتله د لږ تلفاتو په ورکړه راووتل، خو افغان چارواکي اندېښنه ښيي چې ښایي د کرونا درېیمه څپه خطرناکه او خونړۍ وي. د عامې روغتیا سرپرست وزیر وحید مجروح پرون په یوه خبري غونډه کې د خبرو پر مهال وویل چې د کرونا د کنټرول لپاره جدي اقداماتو ته اړتیا ده او د حکومت په ګډون عامو افغانانو ته هم په کار ده چې د خپل ځان او کورنۍ د ساتلو لپاره اړین تدابیر په پام کې ونیسي.
د روغتیا وزارت سرپرست وحید مجروح زیاته کړې چې دوی د ایران او پاکستان پولو ته څېرمه پر تګ راتګ بندیز، له هند سره د پروازونو قطع کېدل، د راټولېدنو مخنیوی او د اضطراري کمېټو فعالولو طرحه له حکومت سره شریکه کړې ده. هغه پر ولایتي رییسانو هم غږ کړی چې باید د دغه ویروس د مخنیوي لپاره اړین اقدامات وکړي او باید پوره چمتووالی ورته ونیسي. سرپرست وزیر دغه راز د اکسېجن کموالی هم جدي ستونزه بللې او پر اړوندو ادارو یې غږ کړی، چې ژر تر ژره دې د کرونا ویروس د ناروغانو لپاره د اکسېجن د تولید کچه لوړه کړي.
هغه په خپلو خبرو کې د عامې روغتیا وزارت ولایتي رییسانو ته هم سپارښتنه کړې، چې هر ډول احتمالي پېښو ته باید تیار وي او د دې وړتیا دې ولري چې په خپلو ولایتونو کې د کرونا وبا د کنټرول لپاره اقدام وکړي. له دې سره جوخت د ننګرهار ولایت ځايي چارواکي وایي چې د کرونا درېیمه څپه په دغه ولایت کې پيل شوې ده. د دغه ولایت د عامې روغتیا ریاست چارواکي وایي چې هره ورځ تر سلو پورې تازه مثبتې پېښې په دغه ولایت کې ثبتېږي. ننګرهار د ډیورنډ فرضي کرښې ته څېرمه پروت ولایت دی چې تر ډېره خلک له دې لارې پاکستان ته تګ راتګ کوي. پاکستان، ایران او هند بیا هغه هېوادونه دي چې د کرونا د درېیمې څپې اوج پکې دی او هره ورځ د لسګونه کسانو ژوند اخلي. عامې روغتیا وزارت دا خبرداری هم ورکړی چې که له دې دریو هېوادونو سره په تګ راتګ کې اړین روغتیايي تدابیر مراعات نه شي، نو ښايي خطرونه یې تر دې هم ډېر شي. د عامې روغتیا وزارت چارواکي وايي چې له پاکستان او ایران سره پر پوله هره ورځ د ۴۰ او۵۰ زرو ترمنځ افغانان تګ راتګ کوي چې په هېواد کې یې د کرونا د بلې څپې خطر لوړ کړی دی.
بلخوا په هند او ایران کې بیا د کرونا تازه څپې ستر ناورین جوړ کړی دی. د وروستیو معلوماتو له مخې، په ایران کې هره ورځ تر پنځو سوو پورې کسان د کرونا له امله مري او اوس په ۲۴ ساعتونو کې د مثبتو پېښو شمېر په دغه هېواد کې تر ۲۰ زرو هم اوړي. په هند کې بیا هره ورځ شاوخوا ۳۵۰ زره نوې مثبتې پېښې ثبت کېږي او دغه هېواد یې له سخت ناورین سره مخ کړی دی. نړیوالو په تېره اروپايي هېوادونو او امریکا په تازه څرګندونو کې ټینګار کړی چې له هند سره باید د کرونا له امله د بشري ناورین د رامنځ ته کېدو مخنیوی وکړي.
