په هېواد کې په وروستیو کې د پرله پسې مرموزو اورلګېدنو په دوام تېره شپه د کابل په شمالي دروازه کې یوه درنه اورلګېدنه رامنځ ته شوې ده. د معلوماتو له مخې، په پېښه کې ځاني او مالي زیانونه اوښتي او تر څنګ یې خلکو ته سختې اندېښنې هم پیدا کړې دي.
عام وګړي د دغه ډول پېښو په اړه ډول ډول غبرګونونه ښيي، خو تر څنګ یې په مشرانو جرګه کې سناتوران هم حکومت د دې پېښو په اړه په بې پروایۍ تورنوي. دوی وایي، باید ژر تر ژره روښانه شي چې د دغو پېښو لامل څه دی او کومې کړۍ یې تر شا لاس لري.
تېر ماښام د کابل د شکردرې ولسوالۍ اړوند په شمالي دروازه کې درنه اورلګېدنه رامنځ ته شوه. دغه اورلګېدنه لومړی د تېلو په یوه ټانکر کې رامنځ ته شوې، له دې ځایه نورو ټانکرونو ته غځېدلې ده، باروړونکي موټر یې سوځېدلي او د تېلو تر یوه پمپ پورې د دې اور لمبې رسېدلې دي. ویل کېږي چې په دې پېښه کې لسګونه ټانکرونه سوځېدلي، خو دقیقه شمېره یې نه ده په ډاګه شوې. یوازې دا نه ده، بلکې د دغه اور له امله ګڼ باروړونکي موټرونه، د خلکو کورونه او یو د تېلو پمپ ویجاړ شوي دي. له دې ورهاخوا بوږنوونکې خبره دا ده چې دې پېښې ۲۴ هېوادوالو ته مرګ ژوبله اړولې ده. ځينې سرچینې په پېښه کې د نهو کسانو او ځينې بیا د لسو کسانو د وژل کېدو خبره کوي. کورنیو چارو وزارت وایي چې په دې پېښه کې څوارلس کسان ټپیان دي، خو د سیمې اوسېدونکي او عیني شاهدان بیا دا شمېرې لوړې ښيي.
دا لومړۍ پېښه نه ده چې خصوصي سکتور یا افغان سوداګرو ته میلیونونه افغانۍ زیان اوړي، بلکې تر دې وړاندې د هرات او فراه په ګمرکونو کې هم ورته پېښې رامنځ ته شوي چې افغان سوداګر یې سخت زیانمن کړي دي. د دغو پېښو تر ټولو بوږنوونکې یې د هرات په ګمرک کې اورلګېدنه وه، چې نږدې زر د تېلو ډک ټانکرونه او باروړونکي موټر پکې د اور د لمبو خوراک شول. سره له دې چې دغه پېښې په وروستیو کلونو کې تر ټولو بوږنوونکې او خلکو ته د اندېښنې وړ بلل شوي، خو تر دې دمه حکومت په دې اړه هېڅ راز معلومات له خلکو سره نه دي شریک کړي او نه یې هم د لامل په روښانه کولو بریالی شوی دی.
د ملي شورا د سنا جرګې ګڼو غړو هم تېره ورځ به خپله عمومي غونډه کې حکومت د دغه ډول پېښو پر وړاندې په بې غورۍ تورن کړ او دا مسایل یې د جدي اندېښنې وړ وبلل. دوی وویل چې ښایي ځینې کړۍ د دې پېښو تر شا وي او وغواړي چې په دې توګه د افغانستان اقتصاد ته زیان ورسوي، نو له همدې امله حکومت ته په کار ده چې ژر تر ژره لاس په کار شي او د یادو پېښو ټول اړخونه روښانه کړي. د مشرانو جرګې غړی انجنیر محمد خان وایي، حکومت دې دا پېښې وپلټي، څو روښانه شي چې دا تخنیکي ستونزې دي او که نه د دښمن ورانکاره فعالیتونه دي. د ده په وینا: «دا باید حکومت روښانه کړي، چې د دښمن کار دی که تخنیکي ستونزه ده».
د مشرانو جرګې غړو دغه راز حکومت په ګمرکونو او وردوي دروازو کې په کمکارۍ او فساد تورن کړ او په خبره یې، د دوی د بې پروایۍ له امله افغان سوداګرو ته مالي زیانونه اوړي چې بیا یې وروسته لامل هم نه روښانه کېږي او پلټنه یې هم نه کېږي. د مشرانو جرګې رییس فضل الهادي مسلمیار وویل چې دا پېښه باید په هر اړخیزه توګه وڅېړل شي.
د مشرانو جرګې لومړی مرستیال محمد علم ایزدیار بیا وایي چې حکومت هېڅ ځان د ورته پېښو په اړه مسوول نه بولي او نه هم دې ته تیار دی چې د ولس پوښتنو ته ځواب ورکړي. د ده په خبره، حکومت دې ژر تر ژره ولس ته د یادو پېښو په اړه وضاحت ورکړي او هغه دې په هر اړخیزه توګه وڅېړي.
