پومپیو: د افغان جګړې ختمولو یواځینۍ لار د سولې خبرې دي

د امریکا د بهرنیو چارو وزیر مایک پومپیو وایي افغانان باید د اوږدې جګړې د ختمولو لپاره مذاکرات وکړي او له دې لارې یوې پایدارې سولې ته ورسېږي. نوموړي ویلي چې امریکا په دې برخه کې له ښکېلو لوریو سره په خبرو بوخته ده او دوی به په بشپړه توګه د دې بهیر ملاتړ وکړي. پومپیو زیاته کړې چې خلیلزاد د افغان سولې لپاره هر اړخېزې هڅې پیل کړې دي او د هغه له هڅو داسې ښکاري چې په افغانستان کې اوږدمهاله جګړه د ختمېدو په حال کې ده. هغه ویلي افغانان باید د خبرو له لارې یوې ټولیزې حل لارې ته ورسېږي. نوموړي په خپلو خبرو کې دغه راز زیاته کړې چې خلیلزاد له افغان مشرانو او نورو ښکېلو اړخونو سره په لیدنو کې هغوی ته دا پیغام رسولی چې د دې کشالې یواځینی حل د سولې مذاکرات او خبرې اترې دي. پومپیو زیاته کړې، دوی د افغانانو په مشرۍ د سولې خبرو ملاتړ کوي او هڅه یې دا ده چې په دې جنګ ځپلي هېواد کې یوې پایدارې سولې ته د رسېدو لپاره اسانه لارې چارې ولټوي.