سیمه ییز چارواکي: ارزګان لا هم د طالبانو په محاصره کې دی

د ارزګان ولایت د والي مرستیال وایي چې یاد ولایت لا هم د وسله والو طالبانو په محاصره کې دی او ورځ تر بلې امنیتي وضعیت خرابېږي. هغه ویلي چې له تېرو څو کلونو راهیسي په یاد ولایت کې امنیتي وضعیت کې ښه والی نه دی راغلی او لا هم تر ټول ښار وسله وال طالبان چاپېر دي. هغه ویلي طالبانو یاد ښار کلابند کړی او د ولایت اکمالات د هوا له لارې کېږي. د ارزګان ولایت امنیه قومندان هم مني چې ښار د طالبانو تر سختې کلابندۍ لاندې دی، خو په خبره یې افغان پوځیان شپه او ورځ په دې لټه کې دي چې د ترینکوټ ښار او ولسوالۍ له محاصرې خلاص کړي. په ورته وخت کې د یاد ولایت اوسېدونکي ناامنیو تر پوزې راوستي او د امنیت غوښتنه کوي. هغوی شکایت کوي چې دولت ورسره د مور میرې چلند کوي. دوی وایي دا خو لرې ده چې حکومت دې په یاد ولایت کې رغنیز کارونه وکړي خو په خبره یې دا ولایت له څو کلونو را وروسته د طالبانو په محاصره کې دی اما حکومت تر اوسه په دې اړه هیڅ اقدامات نه دي کړي.