ولسمشر غني: طالبان د برید په غندلو ځان له مسوولیت نه شي خلاصولی

افغان ولسمشر محمد اشرف غني وايي، کابل کې د علماوو پر غونډه د وروستي برید په غندلو سره طالبان نه شي کولای ځان له مسوولیته وژغوري. وړمه شپه کابل هوايي ډګر ته نژدې د واده په یوه تالار کې ځانمرګي برید لږ تر لږه ۵۵ تنه ووژل او لسګونه کسان ژوبل شول. وسله والو طالبانو برید غندلی او وايي، د دوی کار نه دی. ولسمشر غني په ایمرجنسي روغتون کې د پېښې له ټپیانو د لیدنې پر مهال وویل، د برید مسوولیت د هغو پر غاړه دی، چې لومړی ځل یې ځانمرګي بریدګر افغانستان ته راوست. دده په وینا پر دیني علماوو او دیني مراسمو دغه ډول برید ټول حدود مات کړل. دده په خبره ددغه ډول بریدونو طراحان او ترسره کوونکي په ګاونډیو هېوادونو کې روزنځایونه او پټنځایونه لري. ولسمشر یو ځل بیا پر طالبانو غږ وکړ، چې د عمل په ډګر کې دې له جګړو لاس واخلي او خلکو ته دې ثابته کړي چې دوی نور د افغانانو وینې نه تویوي.