ولسمشر غني: حکومتي ادارې له داخلي تولیداتو استفادې ته ژمنې دي

ولسمشر غني وایي حکومتي او دولتي ادارې له داخلي تولیداتو ګټه اخیستنې ته ژمنې دي. نوموړي دا څرګندونې نن په ارګ کې د صنعتکارانو او کسبګرو له ملي ټولنې سره په لیدنه کې کړې دي. له ارګه د خپرې شوې خبرپاڼې له مخي ولسمشر په دې لیدنه کې د کسبګرو د ملي اتحادیې د مشرتابه او غړو غوښتنې او وړاندیزونه واورېدل. د سرچینې په وینا غني کسبګرو ته په خطاب کې ویلي، تاسې هغه مهم قشر یاست چې د افغانستان خلکو ته د کار او ډوډۍ اسانتیاوې برابروئ. ولسمشر څرګنده کړه، د تخنیک پوهنتون ایجاد او د بیمې اجباري کېدو سره موافق دی او د دې لپاره دې واضح طرحې ترتیب شي. د سرچینې په وینا ولسمشر له کسبګرو وغوښتل چې د ښارونو د نظم او چارو د ښه والي لپاره له ښاروالیو سره ګډه کاري کمېټه ایجاد کړي.