له افغانستانه د امریکایي ځواکونو تر وتلو وروسته د امریکا متحده ایالتونه په دې لټه کې دي، چې د سیمې په هېوادونو کې پوځي اډې جوړې کړي او تر ټولو ډېر تمرکز یې هم پر پاکستان دی.
نیویارک ټایمز امریکايي ورځپاڼې راپور ورکړی چې امریکا له پاکستان څخه د پوځي اډو غوښتنه کړې او پاکستان هم په مشروط ډول د امریکا دا غوښتنه منلې ده. په راپور کې وړاندې راغلي، چې د سي ای اې مشر په همدې هدف څو ځله اسلام اباد ته پټ سفرونه کړي او د امریکا دفاع وزير لويد اسټين هم له پاکستاني چارواکو سره په دې اړه خبرې کړې دي. په راپور کې وړاندې راځي چې پاکستان په دې شرط امریکا ته د پوځي اډې ورکولو خبره منلې، چې هر هغه هدف چې د پاکستان له خاورې په افغانستان کې په نښه کېږي، بايد لومړی له دوی سره پرې موافقه وشي.
دا په داسې حال کې ده چې د امریکا د ولسمشر جو بایډن له اعلان سره سم، ټاکل شوې چې د روان کال د سپټمبر میاشتې تر ۱۱مې نېټې به ټول امریکايي او نړیوال ځواکونه له افغانستانه ووځي، خو د نیویارک ټایمز په دغه راپور کې راغلي، چې امریکايي استخبارات هڅه کوي، له افغانستانه د امریکایي ځواکونو تر وتلو وروسته په دغه هېواد کې له ترهګرۍ سره د ګډې مبارزې لپاره یوه تګلاره برابره کړي.
د سرچینې په خبره: « سي ای اې داسې لارې لټوي، چې پر مټ یې په دغه هېواد کې د استخباراتو، جنګ جګړې او له ترهګرۍ سره د مبارزې معلومات راټول کړي، دا په داسې حال کې چې د سي ای اې کارپوهانو د طالبانو ورځ تر بلې زیاتېدونکي خطر خبرداری ورکړی».
که څه هم امریکا ویلي چې له افغانستانه په بشپړ ډول تر وتلو وروسته به هم دوی په سیمه کې حضور ولري او د سیمې په نورو هېوادونو کې له پرتو اډو به په افغانستان کې امریکا ته د هر ډول متوجه ګواښ پر وړاندې اقدام کوي، خو د نیویارک ټایمز په راپور کې ډېر تمرکز پر پاکستان شوی دی. په راپور کې راغلي: «سي ای اې کلونه د پاکستان په لوېدیځو غرونو کې یوه اډه لرله او له هغه ځایه یې د بېپیلوټه الوتکې بریدونه کول، خو په ۲۰۱۱ز کال کې چې د دواړو هېوادونو اړیکې ترینګلې شوې، نو ورسره دا اډه هم وتړل شوه. اوس چې نو په هر ډول معامله کار کېږي، نو دا به د پاکستان حکومت ته خواشینوونکی حقیقت وي؛ ځکه چې له اوږدې مودې راهیسې له طالبانو ملاتړ کوي.»
د یاد راپور پر بنست، د امریکایي او پاکستاني چارواکو ترمنځ په خبرو کې پاکستاني لوري د اډو په بدل کې د بېلابېلو محدودیتونو غوښتنه کړې او ویلي یې دي چې دا باید ورته په ډاګه شي، چې سي ای اې او د امریکا پوځ په افغانستان کې کومې موخې لري.
په راپور کې همدا راز راځي چې امریکایي ډيپلوماټان په سیمه کې په پخوانيو شوروي جمهوریتونو کې د اډو جوړولو احتمال لټوي، خو د روسیې د ولسمشر ویلادیمیر پوتین مخالفت ته یې هم پام دی.
د نیویارک ټایمز د دغه راپور پر بنسټ، د افغانستان په هکله د سي ای اې او د امریکا د پوځ راپورونه خواشینوونکي بلل شوي، چې پکې د افغانستان په جنوب او ختیځ کې د طالبانو او نورو وسلهوالو ډلو لاستهراوړنې یادې شوې دي. دغه راز په راپورونو کې خبرداری ورکړل شوی، چې طالبان کولی شي په څو کلونو کې کابل ونیسي او بیا به پر لوېدیځ د برید لپاره خوندي ځای ورته جوړ وي.
په پاکستان کې د امریکايي اډو په تړاو نیویارک ټایمز داسې مهال دغه راپور خپروي، چې د روان ۲۰۲۱ز کال په اپریل میاشت کې د امریکا د سي ای اې مشر ویلیام بُرنز امریکایي سناتورانو ته وویل، هر څومره چې له افغانستانه د ټولو امریکایي ځواکونو د وتلو نېټه رانږدې کېږي، په افغانستان کې استخباراتي معلوماتو ته زموږ لاسرسی هم ور سره کمېږي.
