سولې ته تر حد ډېره خوشبیني؛ له افغانستانه د امریکا د وتلو په مانا ده

د افغان سولې لپاره د امریکا د ځانګړي استازي زلمي خلیلزاد وروستي سفر او له طالبانو سره د هغه خبرو د سولې لپاره نوې هیلې راټوکولې دي. له سیاسي لارو چاور د سولې مذاکراتو ته د طالبانو حاضرول د ولسمشر غني لومړنۍ ژمنه وه. خو د نوموړي له غوښتنو سره سره دا هڅې بې پایلې وې، تر هغو چې د افغان سولې لپاره د امریکا وروستیو هڅو یو ځل بیا په افغانستان کې پخلاینې ته هیلې زیاتې کړې. زلمي خلیلزاد د افغان سولې لپاره د ځانګړي استازي په توګه تر ټاکل کېدو وروسته وویل چې په افغانستان کې به د سولې لپاره په شپږو میاشتو کې مثبت تغییرات ولېدل شي. د چارو شنونکي چې ډیری وخت امریکایي رسنیو ته د افغانستان پر حالاتو تبصرې او مقالې لیکي په دې باور دي چې د افغان سولې په برخه کې له حده ډېره خوشبیني په دې مانا ده چې امریکا غواړي خپل سرتېري له افغانستانه وباسي. د دوی په خبره طالبانو له پیله دا ټینګار کړی چې څو پورې بهرنیان په افغانستان کې وي دوی به د سولې خبرو ته حاضر نه شي، خو دې وروستیو کې د طالب زندانیانو د خوشې کېدو په اړه خپرې شوې اوازې دا ښیي چې امریکا او طالبان له افغانستانه د بهرنیو ځواکونو د وتلو پر مهالوېش سلا شوي دي. دا په داسې حال کې ده چې ټرمپ د تېرې پنجشنبې په ورځ وویل طالبانو سره یې قوي مذاکرات پیل کړي او ښایي یوې پایلې ته ورسېږي.