د افغانستان برېښنا شرکت وايي چې په تېرو دوو میاشتو کې په کابل او نږدې ولایتونو کې د وارداتي برېښنا ۱۹ پایې په بمونو الوځول شوي دي. د یاد شرکت ویاند سنګر نیازی وايي چې وړمه شپه هم د جنوبي سالنګ په آهنګران سیمه کې د نامعلومو کسانو له خوا د وارداتي برېښنا دوې پایې الوځول شوي چې په دې سره یاد شرکت ته په میلیونونو افغانۍ زیان رسېدلی دی.
نوموړی زیاتوي: «د برېښنا شرکت تخنیکي ټیم سیمې ته رسېدلی، له ارزونې وروسته به په تخریب شویو پایو کار پیل شي، سیمه غرنۍ ده، د پایو جوړول به وخت غواړي، خو زموږ همکاران به هڅه کوي، دا د روان کال په تېرو دوو میاشتو کې ۱۹ مه د برېښنا پایه ده چې تخریبږي چې له امله يې برېښنا شرکت ته میلیونونه افغانۍ مالي زیان اوړي».
په ورته مهال د ملي شورا غړي بیا د برېښنا د پایو الوځول د ځينو مافیايي کړیو کار بولي او ټینګار کوي چې یادې کړۍ د حکومت تر کنټرول لاندې سیمو کې په دغه ډول کړنو سره له دولت او خلکو د باج اخیستنې هڅه کوي.
د مشرانو جرګې غړی میرحاتم ترهخېل وايي: «دا هغه خلک دي، چې له برېښنا شرکت او حکومت څخه د باج غوښتنه کوي، دوی پیسې اخلي او ورانکاري دي او خپل ژوند پر دغو ورانکاریو تېروي».
عام افغانان هم دې چارې اندېښمن کړي او وايي چې د برېښنا اوږدې پرچاوۍ له ګڼو ستونزو سره مخ کړي دي. دوی له حکومت غوښتنه کوي چې د عامه تاسیساتو د ساتنې په موخه دې کوټلي ګامونه اوچت کړي او د برېښنا د پایو تخریبي عناصر دې د قانون منګولو ته وسپاري.
د کابل ښار اوسېدونکی پیغام زیاتوي: « په داسې حال کې چې هوا ډېره ګرمه شوې، د برېښنا نه شتون له ډېرو ستونزو سره مخ کړي یو، ګرمي ده، د دفترونو کارونه او نورې چارې مو هم ډېر اغېزمنې شوي، هغه کسان چې دا ډول کارونه کوي، تر غوښتنه کوم چې افغانان دې نور نه ځوروي، په دغه کار کې څه ګټه درته رسېږي؟»
خو کورنیو چارو وزارت بیا وايي چې د دوی د عامه شتمنیو د خوندیتوب په موخه خپلې هڅې ګړندۍ کړي او خبرداری ورکوي چې د برېښنا پایو له تخریبي عناصرو سره به د قانون له مخې، جدي چلند وکړي. د دغه وزارت مرستیال ویاند حامد روشن زیاتوي: «موږ په دې لټه کې یو چې د دې پېښې عاملین ونیسو، د برق د پایو په نښه کول او تخریبول یو تروریستي عمل دی او د دغه جنایت له ترسره کوونکو سره به جدي قانوني چلن ترسره شي.»
له دې سره جوخت د ولسمشرۍ ماڼۍ د لومړي مرستیال دفتر وايي چې د برېښنا پایو د امنیت د ټینګښت طرحه د بشپړېدو په حال کې ده او ډېر ژر به عملي شي. د یاد دفتر د مطبوعاتو او عامه اړيکو ريیس رضوان مراد که څه هم د دغې طرحې جزیات نه شریکوي، خو وایي چې د خلکو له مرستې پرته د برېښنا د پایو د امنیت ټینګښت ستونزمن کار دی. مراد زیاتوي چې کشفي او استخباراتي بنسټونو د سیمې له خلکو سره کار پیل کړی، چې د برېښنا پایو د تخریبوونکو په نیولو کې مرسته وکړي.
افغانستان له تېرو شلو کلونو راهیسي د خپلې اړتیا وړ برېښنا له ګاونډیو هېوادونو څخه واردوي، خو د دې برېښنا پایې او نور تاسیسات وخت ناوخته د نامعلومو کړیو له خوا له منځه وړل کېږي.
