له افغانستانه د امریکايي او نورو نړیوالو ځواکونو له وتلو سره جوخت، د هغو افغانانو په اړه اندېښنې مخ پر ډېرېدو دي، چې په تېرو دوو لسیزو کې یې له دغو ځواکونو سره په ژباړې او نورو برخو کې مرستې کړي دي.
د امریکا د دفاع وزارت دوو چارواکو له ان بي اېس نیوز سره په تازه مرکې کې ویلي چې له افغانستانه د امریکايي ځواکونو د وتلو لړۍ په بشپړېدو ده، خو ټینګار کوي چې د ټولو ځواکونو په وتلو سره به له هغو افغانانو سره مرسته کول ستونزمن شي، چې کلونه کلونه یې په دغه هېواد کې له امریکايي ځواکونو سره ګډ کار کړی دی.
دغو چارواکو زیاته کړې، که څه هم پنټاګون ویلي چې د خپلو افغان همکارانو د ایستلو په تړاو پر ځینو پلانونو غور کوي، خو په خبره یې، دغه پلانونه د امریکا د ولسمشر جو بایډن تایید ته اړتیا لري. د دوی په وینا، پنټاګون پلان لري چې د جولای میاشتې تر نیمايي پورې خپل ټول ځواکونه له افغانستانه وباسي، خو په دې لنډې مودې کې د خپلو افغان همکارانو ایستل عملي نه ښکاري.
د جیسون کرو او ډي کولو په نوم دغو دوو امریکايي چارواکو ان بي سي نیوز ته ویلي: «موږ د ځواکونو د ایستلو لړۍ نږدې ۵۰ سلنه بشپړه کړې او په راتلونکې لنډې مودې که به دا ناشونې وي چې خپل افغان همکاران هم را سره وباسو».
که څه هم طالبانو په دې وروستیو کې د یوې اعلامیې په خپرولو سره هغو افغانانو ته د خوندیتوب ډاډ ورکړ، چې په تېرو څو کلونو کې یې له امریکايي او نورو نړیوالو ځواکونو سره د ژباړې او په نورو برخو کې همکاري کړې، خو د یادو افغانانو په اړه اندېښنې ورځ تر بلې په ډېرېدو دي.
بلخوا د امریکا د بهرنیو چارو وزارت ویلي چې د افغانستان له ګاونډیو هېوادونو سره یې خبرې کړي، ترڅو په دغه هېواد کې د وضعیت له ترینګلتیا سره سم، د افغان کډوالو پر مخ خپلې پولې پرانیزي. یاد وزارت ویلي، که څه هم ټاکل شوې وه چې له افغانستانه به د دوی د ځواکونو د ایستلو لړۍ د روان کال د سپټمبر تر ۱۱مې پورې بشپړه شي، خو په خبره یې تر دې دمه یې له ۵۰ سلنې ډېر پوځیان او نظامي تجهیزات له یاد هېواده ایستلي دي. د سرچینې په خبره، دوی له افغانستانه د خپلو پوځیانو د ایستلو لړۍ په دې وروستیو کې چټکه کړې، چې ښايي تر ټاکلې نېټې مخکې به پای ته ورسېږي.
له افغانستانه په بشپړه توګه د امریکايي ځواکونو د وتلو نېټې په رانږدې کېدو سره روانه اونۍ د امریکا کانګرېس د یوې بېړنۍ استماعیه ناستې پرمهال د هغو افغانانو د امنیت او خوندیتوب په تړاو اندېښنه څرګنده کړه چې له امریکايي ځواکونو سره یې کلونه کلونه همکاري کړې ده. د کانګرېس یادې ناستې ته د امریکا د بهرنیو چارو وزیر انتوني بلېنکن هم راغوښتل شوی و، خو نوموړي د ډېرو جزیاتو له ورکولو پرته وویل چې دوی د خپلو افغان همکارانو د خوندیتوب لپاره پر ځینو پلانونو غور کوي.
د امریکا د بهرنیو چارو وزارت داسې مهال د افغانستان له ګاونډیو هېوادونو سره د افغان کډوالو پر مخ د پولو د پرانیستل کېدو په تړاو خبره کوي، چې په دې وروستیو کې په دغه هېواد وضعیت ورځ تر بلې د ترینګلتیا پر لور روان دی او هره ورځ پراخې سیمې د طالبانو لاس ته لوېږي.
