چخانسوري: لومړی مرستیال نه دی ممنوع الخروج شوی

د ولسمشر ویاند هارون چخانسوري وایي چې د ولسمشر لومړی مرستیال عبدالرشید دوستم په کابل کې دی او خپلې دندې ته ځي. نوموړي هغه اوازې رد کړې چې ویل کېدل جنرال دوستم یو ځل بیا غوښتل چې ترکیې ته د تداوي لپاره لاړ شي خو په هوایي ډګر کې راګرځول شوی دی. چخانسوري دغه راز په خوست کې د ملي اردو پر لیوا برید ته په اشارې وویل چې یاده پېښه تر څېړنې لاندې ده او هغه کسان چې په دې برخه کې یې کم کاري کړې ده د خپل عمل په سزا به ورسېږي. نوموړي دغه راز د دې پوښتنې په ځواب کې چې حکومت د ژنیو په تېره غونډه کې شوې ژمنې پوره کړې نه دي وویل، حکومت یادې غونډې ته لاسته راوړنې لري او د ژنیو په تېره غونډه کې شوې ژمنې حکومت پوره کړې او دا ځل به هم له یادې غونډې نورې ژمنې تر لاسه کړي. نوموړي وویل چې حکومت له فساد سره د مبارزې په برخه کې ښې لاسته راوړنې لري. چخانسوري د خپلو خبرو پر دوام وویل چې د سولې مشورتي بورډ بشپړ شوی دی او ژر به اعلان شي.