د ولسمشر دویم مرستیال سرور دانش وايي، ټاکنې د سولې له خبرو سره هېڅ تړاو او د ځنډېدو قانوني او سیاسي توجیه نه لري؛ لنډمهاله اداره پخوانی شعار او وروسته تګ دی.
افغان حکومت د ۱۳۹۸ لمریز کال د وري په ۳۱مه د ولسمشریزو ټاکنو په ترسره کېدو ټینګار کوي او طالبانو هم هغه راپورونه په شدت رد کړي چې ګواکي د امریکا له ځانګړي استازي زلمي خلیلزاد سره د سولې خبرو په جریان کې پر لنډمهاله حکومت هوکړې ته رسېدلي، خو د افغان سولې لپاره د امريکا د بهرنيو چارو وزارت استازي زلمي خلیلزاد هیله مندي ښودلې چې له ولسمشریزو ټاکنو مخکې به له طالبانو سره سوله وشي. د راپورونو له مخې، د ټرمپ حکومت په داسې حال کې افغان دولت ته د وري له ۳۱مې د ولسمشریزو ټاکنو د ځنډېدو او موقت حکومت د جوړېدو غوښتنه کړې چې واشنګټن له طالبانو سره د ۱۷ کلنې جګړې د پای ته رسېدو لپاره د هڅو اجازه پيدا کړي.
د ولسمشر د دویم مرستیال له دفتره په خپره شوې خبرپاڼه کې راغلي، سرور دانش د مرحوم استاد قربان علي عرفاني د درېیم تلين په مراسمو کې ویلي، ولسمشرېزې او نورې ټاکنې د افغانستان د سیاسي جوړښت مهم عناصر دي.
ده ويلي: «ټاکنې د سولې له موضوع سره هېڅ اړیکه نه لري او ځنډول یې هېڅ ډول قانوني او سیاسي توجیه نه لري».
په خبرپاڼه کې د سرور دانش له قوله راغلي چې د ملي یووالي حکومت مشرتابه، په ځانګړې توګه ولسمشر او اجرايیه رییس تل د ټاکنو پر ترسره کېدو ټینګار کړی دی.
دانش لنډمهاله اداره زړه، بې مورده، نه عملي کېدونکې، له اساسي قانون سره په ټکر کې طرحه بللې او ويلي يې دي: «دا هغه غوښتنه ده چې له هر چا ډېره د افغانستان د داخلي او بهرنیو دښمنانو په ګټه تمامېږي، نه د افغانستان د خلکو په ګټه».
د ولسمشر مرستیال ټولو سیاستوالو ته وړاندیز کړی چې که په راتلونکي کې د «اساسي قانون تعدیل» لپاره زمینه برابره شي، ټول کولای شي خپلې طرحې او وړاندیزونه وړاندې کړي، خو تر هغو د سولې، ټاکنو، د سیاسي نظام او ټاکنیزو ټکټونو د جوړېدو په تړاو د قانون خلاف هر ډول طرحه د افغان ملت لپاره د منلو وړ نه ده.
