د کابل د علماوو شورا مرستیال مولوي عبدالبصیر حقاني پرون تر ماسپښین وروسته د کابل ښار د اوومې امنیتي حوزې په مربوطاتو کې د ناڅرګندو وسله والو له خوا ترور شوی دی.
د کابل د پولیسو ویاند بصیر مجاهد وايي چې مولوي حقاني په چهلستون سیمه کې وژل شوی دی.
مجاهد زياته کړې چې پوليسو تر پېښې وروسته په سیمه کې یو تن له وسلې سره نیولی دی.
مولوي عبدالبصیر حقاني له تېرو څو کلونو را په دېخوا د کابل د علماوو شورا د مرستیال په صفت دنده ترسره کوله.
نوموړی د کابل د علماوو په منځ کې له مطرحو کسانو يو و چې ډېر کله به یې د نظام په ننګه له رسنیو سره مرکې کولې.
مولوي عبدالبصیر حقاني تېره اونۍ د ولسمشر غني د هغو څرګندونو هم هرکلی کړی و چې ویلي وو، په حکومت کې دې د علماوو ونډه او رول زیات شي.
د نوموړي د وژلو پړه لا چا پر غاړه نه ده اخيستې، خو د ترور پېښه یې داسې مهال رامنځته شوې چې تېره اونۍ په کابل کې د میلاد النبي د نمانځنې يوه غونډه چې ګڼ شمېر ديني عالمان ورته را ټول شوي وو، په نښه شوه. په غونډه کې بمي چاودنه وشوه چې له کبله يې ۵۵ تنه شهيدان او ۹۴ نور ټپیان شول.
