د ولسي جرګې غړي وایي، د ګډو ځواکونو په عملیاتو کې تر ډېره ملکي خلک وژل کېږي.
دوی وایي چې ګډ ځواکونه له تېرو څو میاشتو راهیسې پر ملکي سیمو خپلسري عملیات کوي، د ښځو ماشومانو په شمول بې ګناه ملکي کسان وژني، خو تر اوسه حکومت په دې تړاو د دوی غږ نه دی اورېدلی.
وکیلان وایي چې د بېګناه افغانانو وژل کېدل له یوه مشخص ادرس څخه کېږي او باید حکومت دا مسئله روښانه کړي او د څېړنې لپاره یې مشخص هیئت وټاکي.
پر ملکي سیمو د افغان او بهرنیو ځواکونو هوايي بریدونه او ځمکني عملیات چې له امله یې ډېره مرګ ژوبله ملکي کسانو ته اوړي، د ولسي جرګې د غړو له جدي غبرګون سره مخ شوي دي.
د دې جرګې غړي وایي چې پارلمان ته د امنیتي مسوولینو تر استجواب څو ورځې نه تېرېږي، خو په دې موده کې ۴ سوه ملکیان او پوځيان وژل شوي دي.
د ولسي جرګې غړي وایي چې نور دې د ملکي خلکو پر سیمو هوايي بمبارۍ او د بې ګناه افغانانو وژل کېدل ودریږي.
د دې جرګې یوه غړي عبدالرحیم ایوبي په دې اړه وویل: «په دوو پېښو کې چې یوه پېښه یې د ميلاد نبي او بله چې تېره ورّځ په خوست کې په یوه جومات کې وشوه، ۱۲۰ تنه پکې شهیدان شوي، او دغه تېره ورځ په لوګر او ننګرهار کې د افغان او ائتلافي ځواکونو له لوري زیات شهیدان لرو، کله چې له دغه ځایه وزیر صاحبان رخصت شوي تر اوسه ۴ سوه ملکي او نظامي شهیدان لرو.»
په همدې حال کې د ولسي جرګې یو شمېر نور غړي وايي چې پر ملکي سیمو عملیات او د ملکي خلکو وژل کېدل د یوه مشخص ادرس له لوري ترسره کېږي او حکومت باید دا مسئله روښانه کړي.
خو د جرګې یوشمېر نور غړي بیا وایي چې ملي شورا دې په دې تړاو یو هیئت وټاکي، څو د ملکي مرګ ژوبلې عوامل مشخص کړي.
د دې جرګې بل غړی عبیدالله بارکزی وایي: «پرون په خوست کې د ملي اردو په جومات کې، دغه راز په جلال اباد، په لوګر کې، په میدان وردګو کې، په پروان کې؛ دا ټولې وژنې له یوه ادرسه کېږي».
د ولسي جرګې ريیس هم پر ملکي سیمو د افغان او بهرنیو ځواکونو پر ځمکنیو او هوایي بریدونو اندېښنه ښيي او وایي چې د ولسي جرګې اړوند کمېسیون دې په دې تړاو څېړنې وکړي.
نوموړی وايي: « د غیر مسوولانه بمباریو په ترڅ کې زموږ د یو شمېر بېګناه ملکي وګړو شهیدانېدل د پوښتنې وړ دي، دفاعي کمېسیون دې په ځانګړې توګه له دفاع وزارت سره اړیکه ونیسي، ترڅو په راتلونکي کې دا ډول پېښې تکرار نه شي».
د ولسي جرګې غړي داسې مهال د ګډو ځواکونو پر عملیاتو نیوکه کوي چې د پنجشنبې په ورځ دغو ځواکونو په لوګر ولایت کې د یوې کورنۍ اته کسان ووژل او بهرنیو ځواکونو د جمعې په ورځ د پروان په جبل سراج کې د ملکي خلکو پر یوه کور هوایي برید وکړ چې پنځه ملکیان پکې ووژل شول.
