لویه څارنوالي وايي، تر اوسه ورته د ټاکنیزو درغلیو او جرایمو په اړه له ۱۹ ولایتونو ۸۱ قضیې رسېدلې چې په تړاو يې ۲۳۰ کسان تورن او مجرم ګڼل شوي دي.
د لویې څارنوالۍ ویاند جمشېدرسولي پرون په کابل کې خبریالانو ته وویل، په تذکرو کې تزویر، د دغو تذکرو لېږد او کارول، د ټاکنیزو سټېکرونو خرڅول، د ټاکنیزو اساسو مواد غلا، د محلونو د چارو اخلالول او داسې نور هغه موارد دي چې عاملین یې نیول شوي او څېړنې ترې روانې دي.
ده وویل، دا د هغه پلاوي ارزونې دي چې ټاکنیزو شکایتونو ته په پام د لویې څارنوالۍ په مشرۍ د جمهوري ریاست له خوا د هېواد ۱۹ ولایتونو ته ګومارل شوی و.
نوموړي په دې اړه وویل: «تر اوسه چې د کابل په ګډون په ۱۹ ولایتونو کې د انتخاباتو او د انتخاباتي جرایمو اړوند پېښې شوي، په مجموع کې ۸۱ قضیې لوېې څارنوالۍ ته رسېدلې چې وڅېړل شي. په دغو قضیو کې ۲۳۰ کسان تورن دي.»
رسولي دغه راز وویل، په دوی کې ۲۲ کسان د ټاکنو کارکوونکي، ۳۲ د ملکي او نظامي ارګانونو منسوبین، ۴ د ولسوالیو د شوراګانو کاندیدان او ۱۵۵ عام وګړي دي.
د لويې څارنوالۍ ویاند دا هم وویل، د ټاکنو په پروسه کې په ټول هېواد کې ۵۵۴ تذکرې تزویر شوې او د پکتیکا په ولایت کې د ټاکنو د اساس په ۷ ټوکه کتابونو کې ګوتې وهل شوې چې د ټولو په اړه جدي ارزونې او څېړنې روانې دي.
دا په داسې حال کې ده چې د ولسي جرګې د ټاکنو پرمهال، ګڼو سیاسیونو، د سیاسي ګونډونو ملي ائتلاف، مدني ټولنې، د ملي شورا غړو او عامو خلکو په وار وار، د ټاکنو په پروسه کې پر درغلیو انتقادونه کړي دي.
د ټاکنیزو شکایتونو کمېسیون هم ویلي چې د دې پروسې اړوند یې زرګونه شکایتونه ترلاسه کړي دي.
د ازادو اوعادلانه ټاکنو د بنسټ اجرایوي ریيس یوسف رشید له ازادي راډیو سره په خبرو کې د لويې څارنوالۍ دغه هڅه ستایلي، خو ټینګار کوي چې دغه اداره دې د کشفي او امنیتي ارګانونو په مرسته د ټاکنیزو درغلیو نورې قضیې هم کشف کړي.
رشید وویل:«د دغه فساد کچه ښايي ۸۰ قضیو پورې محدوده پاتې نه شي. له لویې څارنوالۍ نه هیله ده چې دغه قضیې یوازې په ولایتونو کې د ټیټ پوړو کسانو په سطحه په پام کې ونه نیسي، بلکې مهم دا دی چې هغه کاندیدان چې په دغه پروسه کې په رشوت کې دخیل وو، هغوی هم باید مستثنا نه شي.»
رشید وويل، لویه څارنوالي باید د ټاکنو په پروسه کې د تورنو او مجرمینو په اړه د خپلو څېړنو نتایج خلکو ته اعلان کړي، تر څو خلک پر عدالت او د حکومت پر حاکمیت باوري شي.
