افغان او ازبکستاني لوري د سرحدي ستونزو په اړه خبرې کړې دي

د ملي دفاع وزارت وايي، چې د بلخ په حیرتان بندر کې د شمال زون مسؤولینو او ازبکستاني پلاوي ترمنځ هوکړه وشوه چې په راتلونکي کې به د هر ډول سرحدي سرغړونو د احتمال مخنیوی کوي. د ياد وزارت په ټويټرپاڼه کې راغلي چې پرون د بلخ ولايت په حيرتان بندر کې د هېواد شمال زون د سرحدي قوماندانانو او د ازبکستان د سرحدي چارواکو ترمنځ په جوړه شوې غونډه کې، د امنيتي او سرحدي ستونزو په اړه خبرې وشوې. سرچينه زياتوي، په دې کتنه کې دواړو لورو د ګډې پولې د لا ښه امنیت د تأمین، د ننګونو حل، لازمې همغږۍ، د سرحدي ځواکونو ترمنځ د اړیکو پیاوړتیا او نورو مسایلو په اړه بحث او خبرې وکړې. سرچينه کاږي، همداراز دواړو لورو موافقه وکړه چې خپلې ستونزې به د خبرو له لارې حل کوي او په راتلونکي کې به د هر ډول سرحدي سرغړونو د احتمال مخه نیسي.