پاکستان: د هند دوې ډرون الوتکې مو ویشتلې دي

پاکستان ادعا کوي چې په کشمیر کې یې د هند دوې بې پيلوټه الوتکې وېشتلې دي. د پاکستان د پوځ ویاند آصف غفور وايي چې یوه الوتکه یې پرون او بله په سه شنبې ورځ وېشتلې ده. دده په خبره د یادو الوتکو ټوټې له دوی سره دي. هند بیا تر اوسه په دې اړه څه نه دي ویلي. آصف غفور وایي په کشمیر کې د هند ټول حرکات څاري او د تخلف په صورت کې به پر هندي ځواکونو بریدونه کوي. پاکستان داسې مهال دغه ادعا کوي، چې تېره ورځ د هند لومړي وزیر نریندرا مودي پاکستان یو نه اصلاح کېدونکی هېواد وباله. ده په خپله مرکه کې ویلي وو، پاکستان سره جګړه هم ګټوره نه ده، ځکه دغه هېواد نه په جګړه او نه هم په خبرو اصلاح کېږي. یادو څرګندونو په پاکستان کې غبرګون پارولی دی. پاکستاني چارواکي او مبصرین دغه خبرې پاکستان ته سپکاوی بولي.