امریکا:  هېڅوک پر افغانستان دا نه شي تحمیلولي چې دولتي سیسټم څنګه جوړ کړي

د امریکا د بهرنیو چارو وزارت سرپرستې مرستیالې اېمیلیا پوما ویلي، د دې روښانه کول چې وسله وال طالبان به له حکومت سره د سولې په صورت کې د افغانستان د دولت په چوکاټ کې څه ډول سیاسي موقف ولري، د افغانستان د منتخب حکومت په پرېکړه پورې اړه لري او هیڅوک دا نه شي کولی په افغانستان تحمیل کړي چې دوی خپل دولتي سیسټم باید څنګه جوړ کړي. هغې ویلي دوی د افغان سولې په موخه له هر اقدامه ملاتړ کوي او زیاتوي دا بهیر باید د افغانانو تر مشرۍ لاندې مخته لاړ شي. هغې په تاجکستان کې د وینا پر مهال وویل، د امریکا ملګري هېوادونه کولی شي، وسله وال د سولې خبرو ته وهڅوي. نوموړې زیاته کړې، د افغان سولې لپاره د ځانګړي استازي په توګه د خلیلزاد معرفي کېدل په یاد هېواد کې سولې ته د رسېدو لپاره د امریکا ژمنتیا څرګندوي. دا په داسې حال کې ده چې امریکا یو ځل بیا پر پاکستان هم فشارونه ډېر کړي او ترې یې جدي غوښتنه کړې چې باید د افغان سولې په موخه خپلې هلې ځلې ګړندۍ او پیاوړې کړي.