د کندهار امنيه قوماندان جنرال رازق وايي چې پر ډيورنډ کرښه د پاکستان له خوا د اغزن سيم د غځولو په اړه مرکزي حکومت چوپ دی، خو په وينا يې دی به د دغه ناقانونه کړنې پر وړاندې ودريږي.
تېره ورځ د کندهار په سپين بولدک ولسوالۍ کې په ډیورنډ فرضي کرښه د افغان او پاکستاني ځواکونو ترمنځ تر هغه وروسته نښته پیل شوه چې د دغه ولایت د امنیه قوماندان جنرال رازق څو ورځې وړاندې وویل چې پاکستاني پوځ ته به اجازه ورنه کړي چې پر ډیورنډ کرښه اغزن سیم وغځوي.
په کندهار کې د سرحدي ځواکونو د درېيمې لوا درستيزوال ډګروال امين الله وایي چې نښته تېره ورځ د سپين بولدک-ښورابک ولسوالیو ترمنځ د سرو څاهانو په سيمه کې د پاکستاني پوځيانو له خوا د اغزن سيم د مخنيوي په غبرګون کې شوې ده.
ډګروال امين الله وویل چې امنیتي ځواکونو په سيمه کې د پاکستاني پوځيانو له خوا د اغزن سیم د غځولو مخنیوی کړی چې پاکستاني لوري ورباندې بريد کړی او وروسته د دواړو لورو ترمنځ نښته رامنځته شوې ده.
په ورته وخت کې پاکستاني پوځيان وايي چې د اغزن سيم په اړه له افغان چارواکو سره هوکړه لري، خو جنرال رازق دا هوکړه نه مني. په کابل کې چارواکي نه مني چې له پاکستان سره په دې اړه هوکړه لري، خو د پاکستان د دې کړنې په اړه يې تل سوړ غبرګون ښودلی دی.
د کندهار امنیه قوماندان جنرال عبدالرازق وايي، په وار – وار یې مرکزي حکومت ته خبر ورکړی، چې پاکستان په غیر قانوني توګه پر ډیورنډ کرښه اغزن سیم غځوي، خو چا یې پروا نه ده کړې.
د یادوني وړ ده، چې پر ډیورنډ کر پرښه د پاکستاني پوځ له لوري د اغزن سیم د غځولو چارې یو کال وړاندې پیل شوې چې په ختیځو ولایتونو دا سیم غځېدلی او یوازې په جنوب کې یې پر وړاندې خنډ جوړ شو.
