خلیلزاد د افغان سولې په اړه د خبرو لپاره اسلام اباد ته ځي

د راپورونو له مخې ټاکل شوې چې د افغان سولې لپاره د امریکا د بهرنیو چارو وزارت ځانګړی استازی زلمی خلیلزاد نن تر دوحې وروسته اسلام اباد ته لاړ شي او ددغه هېواد له لوړپوړو چارواکو سره به پر افغان سوله خبرې کوي. خلیلزاد داسې مهال اسلام اباد ته ځي چې تر دې وړاندې یې په کابل کې له افغان چارواکو او سیاسیونو او په دوحه کې د طالبانو او افغان حکومت له مذاکراتي پلاوو سره کتلي دي. نوموړي همدا راز له ځان سره د مذاکراتو لپاره د یوې نوې طرحې پیغام هم راوړی و او هغه یې له افغان او طالب مشرانو سره شریک کړی دی. په ټوله کې د خلیلزاد وروستی سفر د افغان سولې په اړه مهم ګڼل کېږي او امریکا هم وایي چې خلیلزاد به په دې سفر کې د جګړې د ختمولو لپاره یوه جامع لار پلټي.