د ترکیې د کنفرانس له را نږدې کېدو سره هممهاله د افغان سولې لپاره د امریکا د بهرنیو چارو وزارت ځانګړی استازی زلمی خلیلزاد کابل ته راغلی دی. نوموړي پرون له ولسمشر غني سره دوه ځلې او د ملي مصالحې عالي شورا له مشر او غړو سره کتلي دي. په دې لیدنو کې تر ډېره تمرکز پر افغان سوله، سیمهییزه اجماع او د ترکیې پر راتلونکې غونډې شوی دی. امریکایي لوري ویلي چې دوی د افغانانو تر څنګ ولاړ دي او افغان حکومت باید له یوې واضېح طرحې سره د ترکیې په کنفرانس کې ګډون وکړي.
وروسته له هغه چې د دوحې د سولې بهیر له ځینو خنډونو سره مخ شو او ځنډ پکې رامنځ ته شو، نو امریکا وغوښتل چې د افغانستان د سولې په مسئله کې ملګري ملتونه هم دخیل کړي. له همدې امله دا پرېکړه وشوه چې د افغان سولې لپاره به د ملګرو ملتونو په حضور کې په ترکیه کې غونډه جوړېږي. په دغه غونډه کې به طالبانو او افغان حکومت مخامخ خبرې کوي، دا به د دوحې د بهیر موازي بهیر نه وي، بلکي ستره موخه یې د دوحې بهیر چټکول دي. اوس تازه په همدې تړاو د افغان سولې لپاره د امریکا د بهرنیو چارو وزارت ځانګړی استازی افغانستان ته راغلی دی. هغه په ارګ کې له ولسمشر غني او د ملي مصالحې عالي شورا له رییس ډاکټر عبدالله عبدالله سره کتلي دي.
زلمي خلیلزاد لومړی تر غرمې مخکې له ولسمشر غني سره وکتل او دا لیدنه د دواړو ترمنځ د پلاوي له حضور پرته ترسره شوې وه. په دې لیدنه کې د سولې پر وروستیو پرمختګونو او د استانبول پر راتلونکي کنفرانس خبرې شوې وې. خلیلزاد او مل پلاوي یې بیا مازیګر مهال یو ځل بیا له افغان ولسمشر او د کابینې له ځینو غړو سره د دویم ځل لپاره لیدنه کړې ده. په دې لیدنه کې دواړو لورو د سولې پر وروستیو پرمختګونو او راتلونکو اقداماتو بحث کړی دی. د ارګ له لوري په خپره شوې اعلامیه کې راغلي: «په دغه کتنه کې چې نن مازدیګر په ګلخانې ماڼۍ کې وشوه، دواړو لوریو په ترکیه کې د جوړېدونکي کنفرانس، د هغه د مهالوېش، د یاد کنفرانس ګډونوالو د لیست پر نهایي کولو او وروستیو تیاریو په اړه مفصل بحث او خبرې وکړې».
ارګ د یادې لیدنې په اړه لا ډېر معلومات نه دي ورکړي، خو د ملي مصالحې عالي شورا له لوري په خپره شوې اعلامیه کې راغلي چې خلیلزاد له ډاکټر عبدالله او د ملي مصالحې عالي شورا له نورو غړو سره کتلي دي. په دې لیدنه کې د استانبول پر کنفرانس چې په نږدې ورځو کې به جوړېږي او دغه راز د داخلي اجماع تر څنګ پر سیمه ییزه اجماع هم خبرې شوې دي. زلمي خلیلزاد ویلي چې امریکا اوس او د سولې تر تامین وروسته د افغانانو تر څنګ ولاړ ده او د دوی ملاتړ ته به ادامه ورکوي. د خلیلزاد په خبره، د امریکا ستره موخه دا ده چې په افغانستان کې روانه جګړه ژر تر ژره د خبرو له لارې ختمه کړل شي او له رامنځ ته شوي فرصت ګټه پورته کړل شي.
خلیلزاد دغه راز ویلي چې نړیوال د ترکیې په کنفرانس کې له افغان حکومت د یوې قوي طرحې د وړاندې کولو هیله لري. د خلیلزاد په خبره امریکا د افغانستان د سولې لپاره له ټولو پیل شوو هڅو هر اړخیز ملاتړ کوي او نړیوال تمه لري چې افغان حکومت به د ترکیې په غونډه کې یوه واحده طرحه وړاندې کړي. سرچینه کاږي: «امریکا به د سولې په هڅو او له سولې وروسته د افغانانو ترڅنګ وي».
نوموړي په خپلو خبرو کې وویل، نړۍ تمه لري، چې د افغانستان اسلامي جمهوري دولت به د یوې واحدې طرحې سره د استانبول کتفرانس کې ګډون وکړي. خلیلزاد له افغان حکومت غوښتي چې په یوه خوله د ترکیې په غونډه کې ګډون وکړي او ټول اړخونه دې په دغه کنفرانس کې یو واحد دريځ وړاندې کړي. له دې سره هممهاله د ملي مصالحې عالي شورا وایي چې دوی د سولې لپاره د وړاندې شوو طرحو د توحید په برخه کې کوټلي ګامونه اوچت کړي او په دې برخه کې د پام وړ پرمختګونه رامنځ ته شوي دي.
