د ملګرو ملتونو سرمنشي انټونيو ګوټرېش په دې وروستيو کې د دغه سازمان سرمشريزې ته په وينا کې ويلي، (( د نړۍ د بېلا بېلو سيمو خلک هيله لري، چې سوله ييز، له شرافت ډک او سمسور راتلونکی ولري او له نړيوالې ټولنې غواړي، چې د اقليمي بحران، نابرابرۍ او د هر کس پر وړاندې د نويو ننګونو د مخنيوي لپاره اقدامات وکړي.))
د ملګرو ملتونو د راتلونکي په نوم سرمشريزه په روان کال کې د دغه سازمان له مهمو لوړ پوړو غونډو څخه ده.
ولې (( راتلونکی)) د دغې غونډې د اصلي موضوع په توګه ټاکل شوی دی؟
د دې چارې مستقيم لامل دا دی، چې په نړۍ کې ګډوډۍ مخ پر سختېدو او زياتېدو دي او د انسانانو پر وړاندې د اوکراين او روسيې ترمنځ د کړکېچ، د فلسطين او اسرائيل د شخړې د دوام او د لبنان او اسرائيل ترمنځ د ترينګلو حالاتو په شمول بې ساري ننګونې رامنځته شوې دي. بر سېره پر دې، د اقليمي بدلون، د غلو دانو خونديتوب، د کډوالو بحران او د نوې ټېکنالوژۍ د استعمال په شمول نورې ننګونې هم موجودې دي.
انسانان کوم ډول راتلونکي ته اړتيا لري؟ لا ښه راتلونکی څرنګه ابادیدای شي؟
نړيوالو همدغه دوې پوښتنې په پام کې نيولي او د نژدې ۱۳۰ هېوادونو مشران په نيويارک کې راغونډ شوي او د راتلونکي پرمختګ د لوري په اړه يې بحثونه کړي دي.
د سرمشريزې ګډونوالو د غونډې په لومړۍ ورځ (( د راتلونکي تړون)) او اړوند نور اضافي سندونه (( نړيوال ډيجيټل تړون)) او ((د راتلونکو نسلونو د چارو اعلاميه)) تصويب کړي دي.
د نړۍ هيوادونه پر ياد تړون له ۲ کلنو مذاکراتو وروسته توافق ته رسېدلي، چې په بهیر کې يې له ډېرو لوړو ژورو او ستونزو سره هم مخ شوي دي، خو دغه چاره یې د نړيوال اداري سيسټم د اصلاح، د څواړخيزم د بيا سمسورتيا او د ننګونو پر وړاندې د مبارزې د ټينګ هوډ او ارادې څرګندويي کوي.
په دغه تړون کې د دوامدار پرمختګ، سولې او امنيت، علمي او ټېکنالوژيک نوښت، ځوانانو او راتلونکې زمانې او نړيوالې ادارې په اړه ۵۶ فقره ييز علمي پلان وړاندې شوی او لاسليکوونکو خواوو یې د څواړخيزم د نوې پاڼې د اړولو ژمنه کړې ده. بېلا بېلو خواوو دغه تړون د نړۍ د راتلونکي پرمختګ په اړه د تاريخ ارزښت لرونکی سند بللی دی.
چين د ملګرو ملتونو د امنيت شورا د دايمي غړي په توګه د یادې سرمشريزې ټينګ ملاتړ کړی دی. د چين د دولت رئيس شي جين پينګ ځانګړي استازي او بهرنيو چارو وزير وانګ يي په يادې سرمشريزې کې د سولې او هوساينې، سمسورتيا، عدالت او لا ښه راتلونکي په اړه څلور غوښتنې وړاندې کړي او پر دې يې ټينګار کړی، چې بېلا بېلې خواوې بايد د ملګرو ملتونو په مرکزيت نړيوال سيسټم او د پرمختيايي هېوادونو حقه حقونه وساتي او د ګډو ګټو او ټولشموله اقتصاد د نړيوالو کېدو چارې باید وهڅوي. د چين غوښتنې او وړانديز (( د راتلونکي تړون )) خونديتوب او هم د دغه تړون موخه ده.
د انسانانو د ګډ برخليک ټولنې مفکوره، چې د چين له خوا وړاندې شوې، په تېرو لسو کلونو کې د مخ پر زياتېدونکو خلکو له خوا پېژندل شوې او د ملګرو ملتونو په سند کې هم ثبت شوې ده.
چين د انټرنېټي فضا، اټومي امنيت، سمندر او روغتيا په برخو کې د نړۍ د ګډ برخليک ټولنې د ابادۍ لپاره هڅې کوي او ۳ عمده نړيوال پېشنهادونه يې وړاندې کړي دي. د چين دغو هڅو موخه د ګډو ګټو او توافقاتو راغونډول او د ګډو ننګونو د مخنيوي لپاره د نويو پلانونو برابرول دي.
وانګ يي يادې سرمشريزې ته وينا کې ويلي، چې لوی هېوادونه بايد د پېچلو نړيوالو حالاتو پر وړاندې نمونوي رول، د نړيوال يووالي د هڅوونکي رول او د نړيوالې سولې د بنسټګر رول ولوبوي.
لوی هېوادونه پر نړيوال ستېج د پياوړي ځواک او اغېزې خاوندان دي او بايد د نورو په پرتله زيات مسئوليتونه پرغاړه واخلي، خو ځيني لوېديځ هېوادونه د خپلې بادارۍ د ساتلو لپاره د بېلا بېلو ډلو ترمنځ مقابلې راپاروي، همکاريزې اړيکې يې غوڅوي، د ملګرو ملتونو په مرکزيت نړيوال سيسټم چېلنجوي، نړيوال قوانين له پامه غورځوي او له هغه نړیوال نظام څخه چې د دويمې نړيوالې جګړې وروسته رامنځته شوی، سرغړونه کوي. د دوی دغه کړنې د نړۍ د ګډوډۍ د سختوالي سبب ګرځېدلې دي.
د زياتو هېوادونو استازو په دغې سرمشريزې کې د څواړخيزم د بيا راپورته کولو غوښتنه کړې ده.
که بېلا بېلې خواوې د تړون اصول مراعات کړي، د ګډ برخليک د مفکورې پر بنسټ فکر او پرېکړې وکړي او پر يووالي، همکارۍ او ټولشموليت ټينګار ولري، نو نړۍ به لا ښه راتلونکی ولري.
