د بښنې نړیوال سازمان له پاکستانه غوښتي، چې ژر تر ژر دې په شمالي وزیرستان کې د دریو عامو خلکو د وژل کېدو د قضیې په تړاو د خپلواکو او اغېزمنو څېړنو امر وکړي.
د بښنې په نړیوال سازمان کې د جنوبي اسیا د څانګې څېړونکې رابعې محمود ویلي، که دا راپورونه سم وي چې د پاکستان پوځ لاریون کوونکي په غیرقانوني توګه وژلي دي، دا له نړیوالو قوانینو څخه جدي سرغړونه ده.
د دغه سازمان په اعلامیه کې همدرانګه ویل شوي، چې د نړیوالو قوانینو له مخې د یو هېواد امنیتي ځواکونه یوازې په هغه صورت کې له وژونکې قوې څخه کار اخیستلی شي، کله چې د یو چا د ژوند د بچ کولو لپاره شدیده اړتیا وي.
د اعلامیې په بله برخه کې لیکل شوي: «هغوی چې له اندازې څخه د زیاتې قوې نه یې په غیرقانوني توګه کار اخیستی، باید په ازادو محاکمو کې ورسره حساب- کتاب او عدالت ته وسپارل شي».
دا په داسې حال کې ده چې څو ورځې وړاندې د پښتون ژغورنې غورځنګ دوو مشرانو علي وزیر او محسن داوړ د شمالي وزیرستان د خړ کمر په سیمه کې د یوې ډلې مشرې کوله، چې غوښتل یې په یوه لاریون کې برخه واخلي، خو د پاکستان پوځ پرې ډزې کړې او لسګونو کسانو ته یې مرګ ژوبله اړولې ده.
په دغه برید کې محسن داوړ هم سر سري ژوبل شوی او علي وزیر د پاکستان له پوځ سره بندي دی.
له یادې پېښې وروسته د پښتون ژغورنې غورځنګ او د پاکستان پوځ بېلابېل نظرونه درلودل. پوځ ویلي چې د غورځنګ مبارزینو پر یوې امنیتي پوستې برید کړی او لومړی ډزې هم د پې ټي اېم غړیو کړې دي، خو پي ټي اېم بیا د پاکستاني پوځ دغه ادعاوې رد کړې او ویلي یې دي چې د هغوی ټول غړي بې وسلې وو او هېچا ډزې نه دي کړې.
