وروسته له هغې چې یو شمېر سیاسي ګوندونو په ټاکنو کې له بایومېټریک سیسټم نه د استفادې په اړه اندېښنه څرګنده کړه، اوس د ټاکنو خپلواک کمېسیون وايي چې ټاکنې به د بایومېټریک سیسټم نه په استفادې پر ټاکلي وخت او په شفاف ډول ترسره شي.
د دغه کمېسیون ویاند سید حفیظ الله هاشمي د یکشنبې په ورځ یوې خبري ناستې ته وویل چې د ولسي جرګې په ټاکنو کې په لومړي ځل د بایومېټریک سیسټم او رایه ورکوونکو له نوملړ نه استفاده په ټاکنو کې د شفافیت ښکارندويي کوي.
نوموړي زیاته کړې: «هغه راپورنه چې مخکې خپاره شول چې بایومېټریک د تصویر د شناخت وړتیا نه لري، دغه مسئله سمه نه ده، خپله بایومېټریک چې افلاین وسیله ده، د پېژندنې وړتیا نه لري، خو کله چې سروې ته ځي، داسې سیسټم شته چې څېرې وپېژني او د شهادت ګوته معلومه کړي او تکرار چهرې او تکراري ګوتې ته اجازه نه ورکوي.»
هاشمي دغه راز ویلي، ټولو ولایتونو ته حساس او غیر حساس مواد انتقال شوي او دغه بهیر اوس د ولسوالیو مرکزونو ته پیل شوی او تر جمعې به بشپړ شي.
د ټاکنو خپلواک کمېسیون وايي، د بایومېټریک سیسټم د استفادې لپاره شاو خوا ۲۱ زره کسانو ته زده کړې ورکول کېږي.
دا څرګندونې داسې مهال مهال کېږي چې تازه یو شمېر سیاسي ګوندونو ویلي چې د بایومېټریک دستګاوې تخنیکي ستونزې لري او هغه کسان چې له دغو دستګاوو د ټاکنو په ورځ استفاده کوي، له ځینو ډلو او کسانو سره یې د تړاو په اړه اندېښمن دي.
له دې وړاندې د افغانستان د لوی ملي ائتلاف غړو ویلي وو چې په کابل کې یو شمېر سفارتونه د ځانګړو کاندیدانو په بریالیتوب کې رول لوبوي او د بایومېټریک سیسټم له سیاسي جریانونو او ګوندونو سره یوه ماشومانه لوبه ده.
خو د ټاکنو خپلواک کمېسیون وايي، هر هغه څوک چې په دې پروسه کې مداخله وکړي، له دندې به وشړل شي او عدلي او قضايي بنسټونو ته به معرفي شي.
په ورته وخت کې د افغانستان د ازادو او عادلانه ټاکنو د بنسټ رییس محمد نعیم ایوب زاده وايي، په ټاکنو کې د بایومټریک سیسټم نه استفاده ګټوره ده، خو په دې شرط چې ښه مدیریت یې وشي.
نوموړی زیاتوي: «د انتخاباتو په ورځ یې مدیریت او د انتخاباتو د بهیر له نورو برخو سره یې همغږي کول کولای شي له شفافیت سره مرسته وکړي، فعلاً تیاري نیول شوي دي، خو موږ د بایومېټریک سیسټم د مدیریت په اړه اندېښمن یو، یعنې هغه معلومات چې له بایومېټریک سیسټم نه ترلاسه کېږي، باید ښه مدیریت شي او په ټوله کې په ۳۳ ولایتونو کې ښه تنظیم شي او د شفافیت لپاره یوه ښه اله وګرځي.»
ایوب زاده وايي، د ټاکنو خپلواک کمېسیون باید خپل عملیاتي فعالیتونه چټک کړي او له بایومېټریک سیسټم نه د استفادې لپاره زیات وخت ځانګړی کړي، څو بایومېټریک سیسټم په ښه توګه مدیریت شي.
