د چين دولت رئيس شي جين پينګ د مې د ۱۴مې نېټې په سهار په بېجينګ کې د امريکا له ولسمشر ډونالډ ټرمپ سره ليدلي دي. دواړو خواوو موافقه کړې چې د ”رغنده ستراتيژيک ثبات“ په نوي ليد به خپلمنځي اړيکې ټينګې او پرمخ بوځي.
روان کال د چين د اقتصادي او ټولنيز پرمختګ د ۱۵م پنځه کلن پلان پيل دی او څه باندې ۱.۴ ميليارډه چينايان په همدې کال کې چيني شکله عصريتوب ته پوره او باکيفيته پرمختګ ورکوي. همدغه کال د امريکا د خپلواکۍ له ۲۵۰مې کليزې سره هم برابر دی، نو طبیعي ده له ۳۰۰ ميليونو زيات امريکايان د خپل هېواد د پرمختګ په هڅه کې دي.
رئيس شي جين پينګ په دغه کليدي کال کې د چين او امريکا د اړيکو مهمه لارښوونه کړې ده.
که چين او امريکا د نړۍ د دوو لويو اقتصادونو په توګه خپلمنځي اړيکې ثابتې وساتي او يو د بل درناوی وکړي، په سوله کې ګډ ژوند او ګټې – ګټې همکارۍ پر مخ بوځي، نو دوی ته او هم به ټولې نړۍ ته خورا زيات اهميت ولري.
رئيس شي جين پينګ له خپل امريکايي سيال ډونالډ ټرمپ سره د ليدنې په ترڅ کې ويلي، د چين او امريکا ترمنځ د ”رغنده ستراتيژيک ثبات“ اړيکې بايد د همکارۍ، مناسبې سيالۍ، د اختلافاتو د کنټرول او سولې پر بنسټ له مثبت، سالم، عادي او تلپاتې ثبات څخه ډکې وي او د راتلونکو درېيو کلونو او حتی د اوږدمهال لپاره يې د دواړو هېوادونو د اړيکو پرمختګ ته ستراتيژيک لارښود برابر کړی دی.
رئيس شي جين پينګ او ولسشمر ډونالډ ټرمپ په نويو حالاتو کې څو ځلې ليدنې او تليفوني خبرې کړي او د چين او امريکا د اړيکو عمومي ثبات يې ساتلی دی. دغه ځل دواړو خواوو موافقه کړې چې ”رغنده ستراتيژيک ثبات“ د خپلمنځي اړيکو د نوي ليد په توګه وټاکي او دواړو هېوادونو او ټولې نړۍ ته يې مثبت پيغام ورکړی دی.
د همکارۍ پر محور اړيکې په دې مانا دي، چې چين او امريکا به عمومي حالاتو او تمايل ته په کتو خپلمنځي همکارۍ پراخې کړي. چين او امريکا په خپلمنځي همکاريو د دواړو هېوادونو او حتی د ټولې نړۍ په ګټه زيات او ستر کارونه کولی شي، دوی به خپلمنځي همکاريز لېست پراخ او د همکارۍ ”کېک“ به لوی کړي او له دې لارې به ستراتيژيک ثبات ټينګ وساتي.
سالمه سيالي د زيرو- سم لوبه نه ده، بلکې دا په دې مانا ده، چې دواړه هېوادونه د همدې سيالۍ له لارې د يو او بل پرمختګ او سمسورتيا هڅولی شي. د چين او امريکا ترمنځ سيالۍ بايد په مساوي، معقوله، سالمه او باقاعده توګه ترسره شي.
توپيرونه بايد تر کنټرول لاندې وي. د چين او امريکا ملي واقعيتونه او کلتورونه توپير لري، نو خامخا به یې ترمنځ ټکر موجود وي، خو دا توپيرونه يې باید د تقابل پلمه ونه ګرځي.
تاريخي واقعيتونه بيا بيا ښودلې، چې چين او امريکا په ډاګيزو خبرو خپلمنځي باور زياتولی او په واقعي سلامشورو خپلمنځي توپيرونه کنټرولولی شي.
چين او امريکا بايد د سولې پر بنسټ خپلمنځي اړيکې ټينګې او مخ ته یوسي او دواړه هېوادونه دنده لري چې د نړيوالې سولې بنسټ وساتي. لکه څنګه چې رئيس شي جين پينګ په سوله کې ګډ ژوند د نړيوالو اړيکو بنسټيز اصل بللی، چين او امريکا هم بايد دغه سره کرښه په ګډه وساتي.
