سارا سندرز: د افغان جګړې ختمول د امریکا لومړیتوب دی

امریکا وایي په افغانستان کې دجګړې پای ته رسول دوی ته لومړیتوب لري. د امریکا د ولسمشر ډونالډ ټرمپ ویاندې سارا سندرز په یوه خبري کنفرانس کې ویلي امریکا د افغانستان سولې ته ژمنه ده او ددغه هېواد سوله ورته لومړیتوب لري. د نوموړې په وینا امریکا غواړي د سولې هڅو ته ادامه ورکړي او په دې توګه ځان ډاډمن کړي چې افغانستان به یو ځل بیا د ترهګرو پر مرکز او پټنځای نه بدلېږي. سارا سندرز په دې اړه معلومات نه دي ورکړي چې امریکایی او طالب اړخ د سولې په برخه کې کومو هوکړو ته رسېدلي خو وایي د سولې په برخه کې پرمختګ شوی دی او نور معلومات به وروسته له رسنیو سره شریک کړي. هغه د امریکايي ځواکونو د وتلو د پوښتنې په ځواب کې هم ویلي چې تر دې دمه په دې اړه د خبرو کولو لپاره وخت ډېر دی.