قطر ويلي، سعودي عربستان بلنه ورکړې چې په مکه کې د عرب ليگ هېوادونو په دوو بېړنیو سرمشریزو کې برخه واخلي، خو مالومه نه ده چې د دغه هېواد امیر تمیم به د سعودي پاچا دا بلنه ومني او که نه.
دا په داسې حال کې ده چې په خلیج کې وروستیو کړکېچونو سعودي دې ته اړ کړ، چې عرب لیګ دوې بېړنۍ غونډې راوغواړي او دغې سرمشريزې ته د قطر وربلل د یاد هېواد د چارواکو لپاره مهمه دېره ګڼل کېږي؛ ځکه سعودي عربستان، بحرين، مصر او اماراتو له ٢٠١٧ ز کال راهيسې له قطر سره خپلې ډيپلوماټيکې او اقتصادي اړيکې پرې کړې دي.
دغه څلور هېوادونه پر قطر تور پورې کوي، چې د ترهگرۍ ملاتړ کوي او د دوى سيمه ييز سيال ايران ته ډېر نږدې دى، خو قطر بیا په وار وار دغه تورونه رد کړي دي.
که څه هم دغه کوچنى خليجي سلطنت په تېر ډسمبر کې د خليج د همکاريو شورا سرمشريزه کې د گډون لپاره سعودي ته بلل شوى و، خو د سعودي اوسنۍ بلنه د قطر لپاره په دې مانا هم کېداى شي، چې د گوښې کولو هڅې يې نه دي بريالۍ شوې.
ټاکل شوې چې روانه میاشت په سعودي کې د عربي هېوادونو مشران سره راغونډ شي، څو په خليج کې د زياتېدونکې ترينگلتيا په تړاو خبرې وکړي.
سعودي عربستان دا بېړنۍ سرمشريزه وروسته له هغه رابللې، چې په خليج کې د تېلو پر څو ټانکرونو په مرموز ډول بريدونه وشول او د سعودي عربستان د تېلو يوه نلليکه د حوثي ياغيانو د بې پيلوټه الوتکو له لوري په نښه شوه.
په سيمه کې يوه بله د پام وړ پرمختيا د امريکا د يوې سترې الوتکو لېږدونکې بېړۍ او ٥٢ ډوله بم غورځوونکو الوتکو ځاى پرځاى کېدل دي، چې د امريکا دفاع وزارت جوخت سيمې ته د يو نيم زرو نورو امريکايي ځواکونو، د پټريوټ توغنديو نورې بېټرۍ او د څار الوتکو د استولو اعلان هم کړى دی.
متحده عربي اماراتو ويلي، اړتيا ده چې د روان خطرناک حالت لپاره عربي او خليج هېوادونه يو موټی شي او کېداى شي دغې سرمشريزې ته د قطر وربلل دغه راز يوه گډ دريځ ته د رسېدو هڅه وي.
