سناتوران: له افغانستانه د بهرنیو ځواکونو وتل به وضعیت لا کړکېچن کړي

مشرانو جرګه وایي، که نړیوال ځواکونه په لنډ مهال کې له افغانستانه ووځي، ممکن دا هېواد یو ځل بیا د ترهګرو پر ځاله بدل او نړیوال امنیت وګواښي. د یادې جرګې دویم مرستیال اصف صدیقي یادې حرګندونې د یوې مرکې په ترڅ کړې دي. هغه ویلي، که امریکا له غور پرته د وتلو پرېکړه وکړي، وضعیت ته په کتو امکان لري د افغانستان نظام سقوط وکړي. صدیقي زیاته کړې، له غور پرته په لنډ مهال کې له افغانستانه د بهرنیو ځواکونو وتل به ناوړه پایلې ولري، د ګاونډیو هېوادونو لاسوهنې به بیا ډیرې او کېدای شي د افغانستان نظام سقوط وکړي. ځینې نور سناتوران هم په همدې باور دي او وایي چې په دې برخه کې باید له پوره غور وروسته پرېکړه وشي. دا په داسې حال کې ده چې یو ځل بیا وسله والو طالبانو د افغان سولې لپاره د امریکا له ځانګړي استازي سره په خبرو کې له افغانستانه د بهرنیو ځواکونو پر وتلو ټینګار کړی دی.