د کډوالو چارو کې د ملګرو ملتونو عالي کمېشنرۍ د روانې میاشتې په ۱۵مه نېټه خبر ورکړ، چې د یمن په لوېدیځ ساحلي سيمه کې په چټکۍ سره د جګړې د شدت له امله د دغه هېواد له ۱۰۰ زرو څخه ډېر خلک بې کوره شوي او زرګونه نور اړ شوي، چې د پناه غوښتنې لپاره له باب المندب تنګي په تېرېدو جیبوټي ته لاړ شي.
د ملګرو ملتونو د کډوالو چارو عالي کمېشنرۍ په یوه اعلاميه کې ويلي، که جګړه لا نوره هم شدیده شي، نو په يمن کې به لازيات خلک بې کوره شي او د کډوالو د وتلو بهیر به هم پراخ شي. په تېرو څلورو ورځو کې له یمن څخه په بېړیو کې له ۲۴۰۰ څخه ډېر خلک جیبوټي ته رسېدلي دي، چې له ۶۰ سلنې څخه ډېر یې ښځې، ماشومان او زاړه وګړي دي.
د ملګرو ملتونو د کډوالو چارو عالي کمېشنرۍ په یمن کې د څه باندې ۶۵ زرو ثبت شویو کډوالو او پناه غوښتونکو د امنيت په اړه ژوره اندېښنه څرګنده کړې او په اعلاميه کې راغلي، چې ناامني، ویجاړې شوې لارې، تړل شوې مخابراتي اړیکې او د تګ راتګ محدودیتونه بشردوستانه عملیات له ځنډ او خنډ سره مخ کړي. دغه راز دوامداره ناامني د هغو بشردوستانه او سوداګریزو بېړيو پر تګ راتګ هم اغېزه لري، چې یمن، سوډان او د سیمې نورو سیمو ته خدمات وړاندې کوي.
