نا معلومه وسله والو پر افغان فري فایټر احمد ولي هوتک وسله وال برید کړی

د ازادو سیالیو یا فري فایټ افغان لوبغاړی احمد ولي هوتک سخت ټپي شوی دی. پر احمد ولي هوتک د شپې وسله والو کسانو برید کړی. د هوتک د ترور زوی فهیم وايي چې، د احمد ولي هوتک درملنه کېږي او ډاکترانو ورته ویلي چې روغتیايي حالت یې ښه دی. د فهیم په وینا احمد ولي نن روسیې ته د سیالۍ لپاره روان وو او تېره شپه بګرامیو سیمې ته له خپل روزونکي سره د خدای پامانۍ لپاره ورغلی وو چې د بېرته ستنېدو په لار کې یې بریدګرو موټر درولی، ډزې یې پرې کړي، او په چړو او سوکانو یې وهلی دی. فهیم وویل چې د هوتک ډېر ټپونه پر خېټه، سر او سترګو دي. هوتک شاوخوا درې میاشتې په امریکا کې تمرینونه وکړل چې له خپل روسي سیال مکسیم شیکین سره سیالۍ ته تیار شي. د ټولنیزو رسنیو کاروونکو په پېښه توند غبرګون ښودلی او له حکومت نه یې د عاملینو د نیولو غوښتنه کړې.احمد ولي هوتک تر دې دمه په اتو نړیوالو سیالیو کې ګډون کړی چې اووه یې ګټلې دي.