ولسمشر غني له افغانستان څخه د بهرنیو ځواکونو وتلو ته په اشارې وویل چې طالبانو په هېواد کې جګړې او تاوتریخوالي ته زور ورکړی او د اوسني حالت د دوام هر ډول مسوولیت به د دې ډلې پر غاړه وي. نوموړي خوست ولایت ته د سفر پرمهال یوې لویې غونډې ته په خبرو کې وویل، چې د افغانستان حکومت د سولې ټینګېدو لپاره هر اړخیزې هڅې کړي، خو طالبانو تاوتریخوالي ته دوام ورکړی دی. د نوموړي په خبره: «طالبان باید د سولې خبرو ته کېني او د پرديو په لمسون دې خپل هېواد نه ورانوي.»
غني دغه راز زیاته کړه چې تل یې طالبانو ته د سولې وړاندیز کړی، خو په خبره یې، دې ډلې دغه وړاندیز له پامه غورځولی او خپلو جګړو او تاوتریخوالي ته یې دوام ورکړی دی. د هغه په وینا: «د جګړې د اوږدېدو مسوولیت د طالبانو پر غاړه دی، له طالبانو باید وپوښتل شي چې د چا لپاره جګړه کوي؟ که افغانستان ورانېږي او افغانان وژل کېږي، نو ګټه يې چاته رسېږي.»
ولسمشر غني دغه راز یو ځل بیا پر طالبانو د سولې غږ وکړی او له دې ډلې یې وغوښتل چې اجازه دې نه ورکوي چې افغانستان هم د سوریې، عراق، لیبیا، لنبان او یمن په برخلیک اخته شي او یوې نامعلومې کورنۍ جګړې ته لاړ شي.
طالبانو که څه هم د ولسمشر غني دغو څرګندونو ته تازه غبرګون نه دی ښودلی، خو تېرې جمعې په ورځ د دې ډلې یوه پلاوي په مسکو کې یوې خبري ناستې ته د خبرو پر مهال حکومت تورن کړ چې د سولې لپاره جدي اراده نه لري او د مختلفو بهانو پر بنسټ د سولې پر وړاندې خنډونه جوړوي. دغه طالب زیاته کړه چې د خلیلزاد له لارې یې حکومتي چارواکو ته د اورکم او سولې په تړاو خپله طرحه سپارلې وه، خو په خبره یې چې د افغان حکومت چارواکو د دوی یادې طرحې ته هېڅ ارزښت نه دی ورکړی. طالبان زیاتوي چې د دوی په یاده طرحه کې له افغان حکومت غوښتل شوي چې ټول طالب زندانیان خوشي کړي، د دوی د مشرانو نومونه دې له تور لېست څخه و ایستل شي او په بدل کې به یې دوی هم د ولایتونو او ولسوالیو پر مرکزونو له بریدونو ډډه کوي او د جګړې په شدت کې به د پام وړ کموالی راشي.
د افغان چارواکو او طالبانو ترمنځ د سولې پر سر دا ناندرۍ داسې مهال دي چې له افغانستانه د ټولو امریکايي او بهرنیو ځواکونو وتلو ته له یوې میاشتې کمه موده پاتې ده، خو د هېواد په ګڼو ولایتونو کې جګړو او نښتو زور اخیستی او هره ورځ پکې پر دواړو لورو سربېره، ګڼو ملکیانو ته مرګ ژوبله اوړي.
له دې سره جوخت، د امریکا دفاع وزارت هم په افغانستان کې د تاوتریخوالی اوسنی حالت د اندېښنې وړ بللی او غوښتنه یې کړې چې د سوله ییز حل په موخه د افغان جګړې پر دواړو لورو باید فشارونه ډېر شي.
